Баст сты товарты къордæн æнæмæнг маркировкæ кæнынимæ
Ацы азы 1-æгæм июлæй фæстæмæ Уæрæсейы сæ тыхы бацыдысты сæрмагонд домæнтæ. Баст сты товарты къордæн æнæмæнг маркировкæ кæнынимæ. Уыцы къордмæ хауынц медицинон препараттæ, тамако æмæ къахы дарæс.
Нæ республикæйы базарадон хыз ног уавæрты кусынмæ цæттæ у, æви нæ, ууыл ныхас цыд, промышленнон продукцийы æнæзакъон зилдухимæ тохгæнæг къамисы æмбырды. Видеоконференцийы хуызы йæ амыдта хицауады сæрдар Тускъаты Таймураз. Маркировкæ парахат кæны афтектыл, медицинон организацитыл, æмтгæй базарадыл. Уымæн æмæ Уæрæсейы базарады арæх вæййы мæнг продукци.
Уый та æвзæрырдæм фæзыны фæлхасгæнджытыл æмæ продукцийы хицæуттыл, æмæ расайы финансон хæрдзтæм, загъта премьер. Нымæцон маркировкæ та фадат ратдзæн цыфæнды товары тыххæй фылдæр информаци райсынæн, бафиппайдта экономикон рæзты министр.
Тускъаты Таймураз бабар кодта куыст банывыл кæнын, фæндаггон картæйыл бакусын, æмæ ацы къабазы архайд æмбæлгæ уагыл сæвæрын. Къамисы куысты хатдзæгтæм гæсгæ, ныридæгæн актуалон фарста у контрафакты продукцийы зилдух. Уымæ гæсгæ рæстæгæй-рæстæгмæ арæзт фæцæуы бæрæггæнæн куыст. Мидхъуыддæгты министрад та стыр æргом аздæхта карз нозты æнæнзакъон зилдухы фарста алыг кæнынмæ.
