Рæспубликæйы фæндæгтыл цы уавæр ис, уый мæты кæй æфтауы, уымæ гæсгæ æдасдзинады инспекци афæдзы кæронмæ нæ банхъæлмæ каст, фæлæ сæрмагонд уæрæхгонд æмбырд сарæзта, цæмæй бæстонæй æрдзурой 10 мæйы хатдзæгтыл
Рæспубликæйы фæндæгтыл цы уавæр ис, уый
мæты кæй æфтауы, уымæ гæсгæ æдасдзинады инспекци афæдзы кæронмæ нæ
банхъæлмæ каст,
фæлæ сæрмагонд уæрæхгонд æмбырд сарæзта, цæмæй бæстонæй æрдзурой 10 мæйы
хатдзæгтыл, снысан кæной хъæугæ мадзæлттæ фæндæгтыл уавæр фæхуыздæр
кæнынæн.
Ацы азы 10 мæйы хатдзæгтыл дзургæйæ,
республикæйы фæндæгтыл цæуыны æдасдзинады паддзахадон инспекцийы
разамонæг Беккуызарты Хасанбег куыд фехъусын кодта, афтæмæй уыцы
æмгъуыдмæ республикæйы æрцыд 612 фæндаггон фыдбылызы, уыдоны фæмардысты
129 адæймаджы, 870 та фæцæф сты. Уымæн аххосæгтæ бирæ ис, фæлæ сæйрагдæр
баст у, шофыртæ уагæвæрд кæй халынц, æгæр тагъд кæй цæуынц, уыимæ.
Программæ «Æдасдзинад»-мæ гæсгæ, фæндæгтыл сæвæрдтой 19 комплексы
камерæтимæ. Уыдон сентябры сбæрæг кодтой 131 мин æгъдаухалæджы, октябры
та – 76 мины. Æмæ ацы нымæцтæ æвдисынц, цас ахадгæ мадзал у, уый.
Беккуызарты Хасанбег, РЦИ-Аланийы
фæндæгтыл цæуыны æдасдзинады паддзахадон инспекцийы разамонæг: «Мах
æнæхъæн афæдз цы куыст фæкодтам, нæ инспектортæ цы æрмæджытæ скодтой, цы
ивартæ рафыстой, æмæ камерæты фæрцы дыууæ мæймæ кæй бакодтой, уыцы
хатдзæгтæ сты иухуызон. Уыцы камерæтæ арæзт сты, цæмæй адæм æдасдæр уой,
сабырдæр цæуой. Уыдонæй иу камерæ адавтой, иннæ ныппырх кодтой,
æртыккаг та хæцæнгарзæй фехстой. Æмæ адæмы æдасдзинадæн арæзт кæйс ты,
уый хъуамæ æппæт дæр æмбарой».
Æмбырды архайджытæ стыр аргъ скодтой,
Дзæуджыхъæуы администраци фæндæгтыл цы куыст кæны, уымæн, уæлдайдæр та
æдасдзинады мадзæлттæн.
Уæлдай æргомздæхт уыд сывæллæтты
хъахъхъæнынмæ. Уыдонимæ 10 мæймæ æрцыд 62 фæндаггон фыдбылызы, 7 дзы
фæмардысты, 62 та фæцæф сты. Кæй зæгъын æй хъæуы, ахуырады министрад
ахсджиагæй архайы кусæндæтты. Бæлвырд фæндтæ ма ис куыст фæуæрæхдæр
кæнынæн дæр. Иумæйагæй зæгъæн ис, æмæ республикæйы цæрджыты фæндаггон
фыдбылызтæй хъахъхъæнын у æппæт æхсæнады хæс.
Дзанайты Олег, РЦИ-Аланийы фæндæгтыл
цæуыны æдасдзинады паддзахадон инспекцийы æхсæнадон советы уæнг: «Æз
мæхæдæг арæх фæцæуын фæндагыл æмæ фæуынын: светофор сырх куы уа, уæд
сывæллон нæ рахиздзæн. Хистæртæ тæа, сырх у, цъæх у, уый нæ хынцынц, æмæ
кæд фæнды дæр цæуынц, сæхи нæ хъахъхъæнынц. Æмæ кæстæртæ цас зонынц,
хистæртæ уыйбæрц цæуыннæ æмбарынц!»
18 ноябры æппæт Уæрæсейы уыдзæн
фæндаггон фыдбылызты амæттæгты мысæн бон. Дзæуджыхъæуы дæр ацæудзæн
сæрмагонд мадзал, цæмæй ма адæмæн иу хатт сæ зæрдыл æрлæууын кæной,
фæндагыл хи раст дарын цас ахсджиаг у, уый.
Фæрниаты Мæдинæ
