Ахæм бæрæггæнæнтæ сæрмагонд æмбырды фехъусын кодта Дзанайты Барис
Ацы азы фыццаг 5 мæймæ Цæгат Ирыстонмæ æрбацыдысты 800 мин туристы. Ахæм бæрæггæнæнтæ сæрмагонд æмбырды фехъусын кодта Дзанайты Барис. Ныхас цыди туризмы къабаз дæсны кадртæй баххæст кæныныл. Ахуырады æмæ наукæйы министрадæн загъд уыдис, цæмæй программæтæм бахæссой ивддзинæдтæ амалхъомдзинады домæнтæм гæсгæ. Уыимæ хъæуы банымайын бынæттон компаниты домæнтæ æмæ сын бацæттæ кæнын сæ профильмæ гæсгæ специалисттæ. Туристон къабазы минæвæрттæ фыццаджыдæр куыд фæбæрæг кодтой, афтæмæй сæ хъæуы хæринаггæнджытæ, официанттæ, гидтæ æмæ администратортæ. Нæ республикæйы 27 астæуккаг профессионалон ахуыргæнæндоны æрмæстдæр дæсы æххæст кæнынц уазæгуарзондзинады программæмæ гæсгæ кадртæ. Ацы аз уыцы ахуыргæнæндæтты ис 580 бынаты, уый фаронимæ абаргæйæ у 50 бынаты фылдæр. Уымæй уæлдай Дзæуджыхъæуы политехникон техникум рамбылдта федералон субсиди, цæмæй проект Профессионалитеты бацархайа, уый тыххæй. Паддзахадон æххуысы бæрц у 70 милуан сомы.
