Бындурон цалцæгæн фиддонты æмвæзад у 68 проценты
Дзæуджыхъæуы Кутузовы уынджы бирæуæладзыгон хæдзары цæрджытæ хъаст кæнынц сæ уавæртæй. Бæстыхайы сæрæй тæдзы, электрон тыхдæттæг телтæ дæр ивинаг. Адæм сæхи хъарутæй бацархайдтой цалцæггæнæн куыстытæ бакæныныл, фæлæ уыдон фаг не сты. Цæгат Ирыстоны бындурон цалцæджы фонд сын зæрдæ бавæрдта, фарста хæстæгдæр рæстæг алыг кæнынæй. Ацы азы кæронмæ республикæйы сæрмагонд программæмæ гæсгæ сцалцæг кæндзысты 22 хæдзары. Бæлвырддæр радзурдзæн хабæрттæ Тъехты Элинæ.
Кутузовы уынджы нæуæдз æртыккæгæм хæдзары фыццæгæм корпусы бæстыхай арæзт æрцыд 1972 азы. Бирæ азты дæргъы хæдзары сæры кæлæддзаг уавæр хъыгдары цæрджыты. Уаргæ бон уæллаг уæладзыджы цæрджытæм ныхъхъары дон.
Борыхъуаты Ферузæ: «Æддейы куыд фæуары, мидæгæй дæр нæм афтæ уары. Уæлдай нæм нæу. Нæ бон куыд вæййы, афтæ фæхъахъхъæнæм нæ фатертæ. Фарон дыууæ хатты сцалцæг кодтой, фæлæ та ацы аз уарынтæ куы райдыдтой, уæд та нæм хъарын дæр райдыдта. Мах кары адæмæн нæ, фæлæ фæсивæдæн дæр зын у ахæм уавæрты».
Бирæ азты хæдзары цæрджытæ цыдысты æххуысагур, æмæ сæ ныр, кæй зæгъын æй хъæуы, фехъуыстой. Бындурон цалцæджы программæмæ гæсгæ хæдзары сæр хъуамæ баивой хæстæгдæр рæстæг.
Щегрены уынджы фыццæгæм «А»-йы хæдзары сæр аивтой æрæджы. Цæрджытæ сæ зæрдыл дарынц, советон рæстæг специалисттæ хæдзары сæр арæх кæй ивтой, уый. Уый фæстæ сæ 30 азы дæргъы хъыгдæрдта уарыны дон. Фарон бындурон цалцæджы программæмæ гæсгæ хæдзары сæр ивд æрцыд.
Мамиаты Руслан: «Нæ хæдзары цæрджытæ федтой цы кусджыты къорд нæм æрцыд, уыдоны. Сæ куыст æмæ сæ арæхстдзинад нæ зæрдæмæ фæцыд. Схонæн цæ ис æцæг дæсны адæм. Кæд къæвдатæ вæййынц, уæддæр махæн тæссаг нал сты».
Бындурон цалцæджы программæмæ нæ хауынц хæдзæртты бацæуæнтæ. Уыцы фарстайыл хъуамæ архайой хæдзары кампанийы сæргълæууæг, кæнæ хæдзæртты хицæутты æмбалад. Фæлæ æддагбакаст, хæдзæртты сæртæ æмæ коммуникацитæ хауынц фондмæ.
Бындурон цалцæгæн фиддонты æмвæзад у 68 проценты. Уый тыххæй специалисттæ кæнынц хъаст. Цæрджыты æнцойдзинады тыххæй бафыссынц реструктуризацион бадзырдтæ. Ныр сты иу мин æмæ 7 сæдæйы онг.
