Бæлвырддæр та, Уæрæсейы Социалон фонды реабилитацийы центрты йæхи чи дзæбæх кæны, уыдонæн
Ацы азы райдианæй Цæгат Ирыстоны фæуæрæхдæр сты, сæрмагонд æфсæддон операцийы архайджытæн æххуысы мадзæлттæ. Бæлвырддæр та, Уæрæсейы Социалон фонды реабилитацийы центрты йæхи чи дзæбæх кæны, уыдонæн. Уыимæ æфсæддонтæ сæхи кæм дзæбæх кæнынц, уырдæм æмæ фæстæмæ сын бафидынц фæндаггаг транопорты æппæт хуызтæн: поезд, хæдтæхæг, автобус, кæнæ рог машинæ. Бæстондæр радзурдзæн Чехойты Фатимæ.
Фыдыбæстæ хъахъхъæнæг Вячеслав Шабровæн йæ къух уæззау цæф фæци, сæрмагонд æфсæддон операцийы уæвгæйæ. Скодтой йын бирæ алыхуызон операцитæ æмæ дзæбæхгæнæн процедурæтæ. Æфсæддоны бахъуыд реабилитаци ацæуын дæр. «Фыдыбæстæ хъахъхъæнджыты» Фонды филиалы социалон координатортæ йын ссардтой профилон санаторий. Уым Вячеслав дарддæр дзæбæх кодта йæ цæф къух.
Дзæбæхгæнæн процедурæтæ сты лæвар, уымæй уæлдай сæрмагонд æфсæддон операцийы архайджытæн фадат ис реабилитаци ацæуынæн хи *взæрст медицинон куыстуаты. Бæстæйы алы регионты кусынц Социалон фонды 12 профилон центры. Ис сын бæрзонд технологон къæпхæн, ифтонг сты хъæугæ фæрæзтæй. Реабилитаци дзы цæуы нырыккон домæнтæм гæсгæ.
Афæдзы райдианæй фæуæрæхдæр сты сæрмагонд æфсæддон операцийы ветерантæн æххуысы гæнæнтæ: Уæрæсейы социалон фондæй сын лæвæрд цæуынц билеттæ реабилитацион центртæм æмæ фæстæмæ цæуынæн. Ног фиддонтæ сты уæлæмхасæн, ныридæгæн цы фæндаггон хæрдзтæ ис, уыдонмæ. Спайдагæнæн дзы ис, транспорты цавæрфæнды хуызыл цæугæйæ.
Сæрмагонд цæстдард – фыццаг къорды инвалидтæм. Уыдонæн фадат ис реабилитацион центртæм искæимæ цæуынæн. Уыцы адæмæн дæр фæндаггаг, цæрынæн агъуыст æмæ хæринаг уыдзæн лæвар. Сæрмагонд æфсæддон операцийы архайджытæн центрты реабилитацийы рæстæг ахæссы 21 бон. Медицинон лæггæдтæй уæлдай æфсæддонтæ райсынц психологон æххуыс дæр. Реабилитаци ацæуыны бар ис афæдз иу хатт.
