Бæрæгбоны кадæн 29-æм октябры республикæйы арæзт æрцæудзæн кадджын мадзæлттæ. Ацы организацийы архайды фæрцы мингай лæппутæ æмæ чызджытæ слæууыдысты царды раст фæндагыл.
Андиаты Сосланæн иу уæгъд минут дæр нæй. Уæгъдибар хъæбысхæстæй 2 хатты олимпаг чемпион у Цæгат Ирыстоны Парламенты промышленносты, транспорты, бастдзинады æмæ амалхъомдзинады комитеты сæрдар, хæххон аграрон университеты физикон хъомылады æмæ спорты кафедрæйы сæргълæууæг. Йæхæдæг куыд зæгъы, афтæмæй ахæм æнтыстдзинæдтæ йæ къухы кæй бафтыд, уымæн ын стыр æххуыс фæцис фæсивæды коммунистон цæдисы архайд. Фæскомцæдисы рæнхъытæм бацыд нырма скъоладзауæй. Активонæй архайдта республикон комитеты, цалдæр азы уыд Советон Цæдисы уæгъдибар хъæбысхæсты иугонд командæйы фæскомцæдисы разамонæг. 1974-æм азы апрелы та уыд организацийы 17-æм съезды делегат. Уæд Мæскуыйы æрæбмырд сты Советон Цæдисы æппæт республикæты фæсивæд.
Андиаты Сослан, РЦИ-Аланийы Парламенты промышленносты, транспорты, бастдзинады æмæ амалхъомдзинады комитеты сæрдар: «Хорз рæстæг уыдис. Æрыгон уыдыстæм, хъæбатыр уыдыстæм. Фæндид мæ, абон комсомолы цы куыст кодтой, ахæм куыст нæ кæстæртимæ куы кæниккой». Абон ахæм куыст нæй. Фæзæгъæм, нæ кæстæртæ раст нæ кæнынц. Уымæн æмæ комсомол уыцы куыст кодта. Фæндид мæ, æндæр хуызы дæр уæд, фæлæ ахæм куыст фылдæр куы кæниккам нæ кæстæртимæ».
Уыцы делегацийы хыгъды уыд Милдзыхты Светланæ дæр. Уæд уыдис Кировы районы фæскомцæдисон комитеты 1-аг секретарь. Уырдæм æй æрбакодта йе `мкурсон æмæ хæлар Таболты Солтанбег. Уыцы рæстæг Светланæ æрхъуыды кæны хъарм зæрдæйы ахастимæ. Ныридæгæн дæр ма йæм ис фæскомцæдисимæ баст хуызистытæ, стæй организацийы архайæджы сæйраг документ – фæскомцæдисон билет.
Милдзыхты Светлана: «Фыццаджыдæр, зын куыст уыдис. Адæмимæ кусын хъуыд, фæсивæдимæ, спортивон, культурон, хъомыладон куыст кæнын хъуыд. Куыст бирæ уыд. Уыимæ уыд цымыдисаг куыст. Комсомолы чи куыста, уыдонæн царды, æвæццæгæн, уыцы бонтæй хуыздæр нæй».
78 азмæ фæсивæды коммунистон цæдисы рæнхъыты уыд мингай лæппутæ æмæ чызджытæ. Уыдысты алы адæмыхæттыты минæвæрттæ. Фæлæ сæ иу кодта Райгуырæн бæстæмæ уарзондзинад.
Хъайтмазты Дзерассæ
