Цæгат Ирыстоны спорты ацы хуызæн ис хъæздыг традицитæ æмæ æнусæй фылдæры онг истори
Ацы бонты бæрæггонд цыди футболы Æппæтдунеон бон. Цæгат Ирыстоны спорты ацы хуызæн ис хъæздыг традицитæ æмæ æнусæй фылдæры онг истори. Йæ сызгъæрин сыфтæ баст сты Уæрæсейы чемпионаты «Спартак-Алани»-йы уæлахизимæ æмæ европæйаг кубоктæ рамбулыны турнирты архайдимæ. Республикæйы спортивон скъолаты минæвæрттæ хъазынц уæрæсейаг клубты. Футболы Академи «Алани» у, фидæны футболы дæсныты кæм хъомыл кæнынц, ахæм куырдадз. Бæлвырддæр хабæрттæ радзурдзæн Чехойты Фатимæ.
Æппæтдунеон футболы бон баиу кодта, пурти йæ цард кæмæн у, стæй æндæр спорты хуызтæй чи архайы, уыдоны. Сæйраг сты бæрæгбоны æнкъарæнтæ æмæ иудзинад. Футболы Академи «Алани»-йы æрдæгхъахъхъæнæг Гаджиты Батраз 10 азы размæ равзæрста спорты ацы хуыз. Ацы бон футболон фæзы арвитын уæлдай æхсызгон у, зæгъы лæппу.
Спорты бæрæгбон традицимæ гæсгæ байгом кодтой кадджын уазджытæ. Республикæйы физкультурæ æмæ спорты министр Фрайты Сослан, Парламенты депутат Дыдарты Сослан æмæ Олимпаг хъæзтыты призер Æлбегаты Руслан фæбæрæг кодтой сывæллæтты спорты рæзты ахсджиагдзинад, арфæйы ныхæстæ ракодтой спортсментæн, цæмæй райсой ирд æнкъарæнтæ, тыхджындæртæ та суой уæлахиздзаутæ.
Хæлардзинады матчы фембæлдысты дыууæ командæйы: иуы – футболон Академийы æрыгон курдиатджын лæппутæ. Уæгъдибар хъæбысхæсты, боксы æмæ æмхæццæ хъæбысхæсты архайджытæ та баиу сты дыккаджы. Кæд хæлардзинады матч уыд, уæддæр дзы рауад æцæг тох. Спорты дæсныты баиу кодта уæлахизмæ тырнындзинад. Уый та уыд мадзалы сæйрагдæр нысан.
Ацы бон æрыгон футболисттæн æрмæст сæ фæлтæрддзинад нæ фæуæрæхдæр. Сарæзтой сын цымыдисаг конкурстæ, уыд сын зындгонд спортсментимæ аныхас кæныны фадат дæр. Академийы хъомылгæнджытæ базонгæ сты, сæ уарзон футболисттæн сæ фæндаг стыр спортмæ куыд рауад, уый тыххæй.
Хуыздæр архайджытæн, куыд æрыгæттæн, афтæ зындгонд спортсментæн дæр лæвæрд æрцыдысты хæрзиуджытæ. Ахæм мадзæлттæ лæппутæ бирæ азты дардзысты сæ зæрдыл. Ахæм архайд сæ разæнгард кæны ног уæлахизтæм.
