филиал вгтрк государственная телерадиовещательная компания “Алания”

Студентон спектакль «Обыкновенное чудо»-йы дæсныйæ райдай, æмæ Уырыссаг академион театры сæйраг рольтæй фæуы. Æдæппæтæй 100 сурæты сарæзта сценæйы Цæгат Ирыстоны адæмон артист Юрий Хафизов. Ацы бонты сбæрæг кодта йæ 50 азы юбилей. Уый кадæн арæзт æрцыд артисты сфæлдыстадон изæр. Юрий Хафизов Уырыссаг театры кусы ныр 23 азы. Фæлæ сценæмæ рацæуыны размæ алы хатт дæр катай фæкæны. Йæ юбилейон гуырæнбоны равзæрста спектакль «Афинаг изæртæ». Ам хъазы бинонты хистæры. Æмæ йæхæдæг куыд зæгъы, афтæмæй йын ацы сурæт тынг хæстæг у, кæд æмæ персонаж зын бамбарæн у, уæддæр: карз домæнтыл хæст, фæлæ йæ чызджы æгæрон уарзтæй чи уарзы, ахæм фыд. Ам æнкъарæнтæ кæрæдзийы ныхмæ æвæрд сты. Уымæ гæсгæ аивадуарзджытæ цымыдисæй фæкæсынц ацы спектакльмæ. Юрийы ‘мкусджытæ куыд зæгъынц, афтæмæй йын алы роль дæр бæрнон вæййы. Архайы йæ персонажы хуыздæр бамбарыныл, æмæ йæ адæмы размæ, куыд æмбæлы, афтæ рахæссыныл. Азтæ куыд цæуынц, афтæ хъæздыгдæр кæны юбиляры фæлтæрддзинад дæр. Нæ республикæйы адæмон артистæн йæ юбилейы фæдыл культурæйы министрадæй радтой Кады грамотæ. Йе мкусджытæ та йын балæвар кодтой хъæлдзæг изæр.