Архайдтой дзы 250 адæймаджы. Сæ арæхстдзинад дзы равдыстой Цæгат Ирыстоны паддзахадон университеты студенткæтæ.
Ацы бонты Сочийы уыд дизайнерты æппæтадæмон конкурс «Подиум-2019». Архайдтой дзы 250 адæймаджы. Сæ арæхстдзинад дзы равдыстой Цæгат Ирыстоны паддзахадон университеты студенткæтæ. Фидæны дизайнертæ æмæ модельертæ аластой сæ проекттæ, æмæ æрлæууыдысты хуыздæрты æмрæнхъ. Не мзæххонтæ уæлахиздзаутæ систы дыууæ номинацийы. Фæлæ ууыл æрлæууынмæ нæ хъавынц. Фидæнмæ сæм ис бирæ фæндтæ æмæ нысантæ.
Хуыйæн машинæйы уынæр, хæсгарды сæрæн карст æмæ рæсугъд нывæфтыдтæ. Ахæм куысты фæстæ фæзыны нырыккон аив уæлæдарæс. Уыдонæй та рауайынц коллекцитæ, æмæ свæййынц модæйы конкурсты уæлахиздзаутæ. Æппæт ацы хъуыддæгтæ фенæн ис Цæгат Ирыстоны паддзахадон университеты хуыйæн æрмадзы. Сæ фæлтæрддзинадыл дзы æфтауынц фидæны дизайнертæ – бакалавртæ æмæ магистранттæ. Æрæджы сын бæрнон жюрийы уæнгтæ стыр аргъ скодтой Сочийы конкрус «Подиум»-ы. Дизайнерты факультеты минæвæрттæ аластой 4 коллекцийы.
Фæстаг цæттæгæнæн мадзæлттæм фæсивæд бæрнон цæстæй кæсынц, уымæн æмæ ам лыстæг хъуыддæгтæ нæй. Æрыгон модельертæ куыд зæгъынц, афтæмæй сæ коллекци у тынг ахсджиаг, баст у Хетæгкаты Къостайы 160 азимæ. Уымæ гæсгæ дисы æфтауы, конкурсы цы дизайнертæ уыди, уыдоны. Уæлдайдæр та, нæлгоймæгтæн цы фæлгонцтæ сарæзтой, уыдон. Цыппæрæм курсы студенттæ сыл зæрдиагæй бакуыстой. Равзæрстой этностиль. Кæй сын фæрæстмæ, уымæн æвдисæн уыд уый дæр, æмæ коллекцийæн аккаг аргъ кæй скодта бренд «Твое»-йы сæйраг дизайнер.
Бзарты Каринæ æмæ Хохты Зæринæ та конкурсмæ аластой 2 коллекцийы. Архайдтой дыууæ номинацийы, æмæ фæуæлахиз сты. Сочийы æмæ æппæтадæмон жюрийы уæнгты дисы бафтыдтой сæ хъуымæцты фактурæтæй æмæ хуызтæй. Нырыккон модæйы фæлгонцтæ аразгæйæ, хъæуы нырыккон хъуыдытимæ æмдзу кæнын. Уымæй дарддæр ма курдиат æмæ фантази бафтауын, æмæ уæд рауайдзæн иттæг хорз коллекци. Хицæн ныхасы аккаг у сæ куыст «Смело в дело». Радтой йын сертификат Америкæйы Иугонд штатты модæйы конкурсы архайынæн.
Конкурс «Подиум»-ы цæгатирыстойнаг модельертæ фыццаг хатт нæ архайынц. Арæх-иу бацахстой фыццаг бынæттæ. Ацы аз дæр дыууæ номинацийы райстой 2 уæлахизы. Призты аккаг ма систы сæ куратортæ – Цæгат Ирыстоны паддзахадон университеты ахуыргæнджытæ. Дзæуджыхъæуы дизайнерты скъола æппæтадæмон конкурсы хатдзæгтæм гæсгæ хаст æрцыд 3 хуыздæр къорды хыгъдмæ.
Дизайнерты æппæтадæмон конкурс «Подиум-2019» Сочийы æрæмбырд кодта 250 архайæджы. Аластой 90 проекты æмæ архайдтой 7 номинацийы. Дыууæйы хуыздæр суæвын уый бæрнон æмæ æхсызгон хъуыддаг у. Афтæмæй цæгатирыстойнаг модельертæ слæууыдысты хуыздæрты æмрæнхъ. Фæлæ ууыл æрлæууынмæ нæ хъавынц. Фидæнмæ сæм ис бирæ фæндтæ æмæ нысантæ. Уый та дзурæг у ууыл, æмæ ма бирæ ног æмæ цымыдисаг коллекцитæ кæй фендзыстæм.
