Уæвгæ, ахæм уавæры куыстмæ цæттæ уыдысты
Ацы бонты тыхджын митæруард фæндаггонд службæйы кусджытæн расайдта æнæрлæугæ куыст. Уæвгæ, ахæм уавæры куыстмæ цæттæ уыдысты. Абон фæндæгты хæдзарады комитеты бæрны чи ис, уыцы регионалон æмæ муниципалон фæндæгты уавæрмæ сæ цæстд дарынц 7 фæндаггон службæйы специалисттæ. Рагагъоммæ бацæттæ кодтой змис æмæ цæхх, цæмæй æрдзы хивæнд митæ сæ куысты къулымпытæ ма расайой, уый тыххæй. Службæ цæттæ у митæфснайæн æмæ сæрмагонд фæндаггон техникæйæ, комплексон машинæтæй, грейдертæй æмæ æндæр хъæугæ техникæйæ. Ацы бонты сæ фæндæгты хæйттæ сыгъдæг кæнынмæ рацыдысты фæндæгтæ аразæн æмæ цалцæггæнæн 3-æм управленийы специалисттæ. Ацы организаци лæггад кæны республикæйы 160 км фæндæгтæн. Уый, Горæтгæроны, Æрыдоны æмæ Дыгуры районты. Ныссыгъдæг кодтой фæндæгтæ, бапырх сæ кодтой сæрмагонд æрмæгæй, цæмæй бырынцъаг ма уой, уый тыххæй. Дзæуджыхъæу-Цыкола-Лескены фæндаджы уаццагыл службæйы кусджытæ архайынц Уртаты Хасаны разамындæй.
