Нæ бæстæ сбæрæг кодта, Советон æфсæдтæ Афганистанæй ракæныны 31 азы бон
Ацы бонты Уæрæсейы кад кодтой æфсæддонтæн-интернационалисттæн. Нæ бæстæ сбæрæг кодта, Советон æфсæдтæ Афганистанæй ракæныны 31 азы бон. Хъыгагæн, нырыккон царды афгайнаг ветерантæн се ппæтæй иухуызон зæрдæйы ахаст нæй. Цæрынц алыхуызон социалон уавæрты. Уыимæ дзы бирæты бон нæу хостæ балхæнын дæр. Не сфæлдыстадон къорд бафæлвæрдта, хæстон цауты архайджытæй цалдæримæ фембæлын. Касаты Наирæ радзурдзæн бæлвырддæр.
Рынчындæтты æмæ афтектыл зилын афгайнæгтæн дæр æнцон хъуыддаг нæу. Джихаты Артурмæ ис сæкæрниз. Йæ ныхæстæм гæсгæ, цæмæй хъæугæ хостæ райса, уый тыххæй йæ æдзух фæхъæуы алыхуызон организацитæм цæуын, æмæ курдиæттæ дæттын. Куыд зæгъы, афтæмæй афтекты æмбæлгæ хостæ нæ дæттынц, уымæ гæсгæ, хостæ балхæны йæхи хардзæй.
Афгайнаг-ветеранты ныхæстæм гæсгæ сын санаторитæм путевкæтæ райсын дæр вæййы тынг зын. Æхсæнадон транспортæй пайда кæныны льготæтæ та иннæ ахæм. Абоны онг дæр ма 80 æфсæддон-интернационалисты рады лæууынц фатертæ райсынмæ.
Социалон фæдзæхстады фонды регионалон хайады зæгъынц, льготæтæй чи пайда кæны, уыцы категорийы адæмы хсæн афгайнæгтæ сты фыццаградонтæ. Уæлдайдæр та, хъуыддаг хостæй æмæ путевкæтæй ифтонг кæныныимæ баст куы вæййы, уæд.
Ацы аз республикæ санаторитæм самал кодта мин путевкæйæ фылдæр. Фыццæгтимæ сæ хъуамæ райсой афгайнæгтæ.
