УФ-йы аивæдты сгуыхт архайæг Уарзиаты Хаджысмел бирæ азты уыд ансамбль «Алан»-ы аивадон разамонæг. Сæвæрдта бирæ кæфтытæ, абон иууылдæр сты классикæйыл нымад.
Фæлтæрдджын кафæг кæстæртæн никуы бавгъау кодта йæ зонындзинæдтæ æмæ арæхстдзинад. Йе ххуыс сæхиуыл банкъардтой ансамбльтæ «Хохаг», «Кафт», «Арт». Йæ цæст дардта хæдахуыр сфæлдыстадон коллективтæм дæр.
Цæрæнбонты куыста национ хореографийы хæзнатæ æмæ культурæ бахъахъхъæныныл.
Абон ын йæ ном ссарынмæ йæ цыртдзæвæны цурмæ æрбацыд бирæ адæм: йæ хъомылгæнинæгтæ, йæ курдиатæн аргъгæнджытæ, культурæйы министрады минæвæрттæ, æмæ, йæ уд кæмæн нæ бавгъау кодта, уыцы уарзон ансамбль «Алан»-ы кафджытæ.
Къубалты Эльбрус, паддзахадон ансамбль «Алан»-ы аивадон разамонæг: «Абон кæсут нæ къорды уæнгтæ иууылдæр æрбацыдысты Хаджысмелы ном æрхъуыды кæнынмæ. Æз æдзухдæр нæ кæстæртæн афтæ фæзæгъын, цæмæй ма рох кæной ансамблæн ном чи кодта, кæй фæрцы сси егъау коллектив, дунейыл æй чи айхъуысын кодта, уыдоны нæмттæ. Хаджысмел цы æвæрæн бахаста, уый та абарæн дæр ницæйымæ ис. Æмæ кæддæриддæр фæзæгъын, нæ коллективы кад мах дæлдæр не руаддзыстæм, фæлæ йæ бæрзонддæр исдзыстæм».
