филиал вгтрк государственная телерадиовещательная компания “Алания”

Куыд цæрыс хъæу? Ацы фарстаимæ не сфæлдыстадон къорд иу æмæ дыууæ комы нæ бабæрæг кодта. Алы ран дæр адæм сæ цардæн амæлттæ кæнынц, сæ фадæттæм гæсгæ. Арæх сæм разыны иухуызон лыггæнинаг фарстатæ. Æрæджы та базонгæ стæм Уæлладжыры комы бæрзонддæр хъæутæй иу Зджыды цардимæ. Куыд рабæрæг, афтæмæй сæ уавæртæ бæллиццаг не сты.

Цард раздæр цæтджинагау кæм фыхт, уыцы хохаг хъæу Зджыды дымгæ фæйлауы ивгъуыд бонты мысинæгтæ. Æгъуызарты Мæирбег ам райгуырд, ам схъомыл, æмæ йын ис цы æрымыса, уый.

Йæ рæстæджы ам царди цалдæр мин адæймаджы. Фæлæ рæстæджы цыдимæ ам æрцыд бирæ ивддзинæдтæ æмæ адæм хуыздæр цардагур алыгъдысты быдыры хъæутæм. Чи ма дзы баззад, уыдон та сты нымадæй цалдæр хæдзары, цæрынц хи фæллойы руаджы.

«Хохы зæхх кадавар у, пайда кæнынц алы чысыл гæппæлæй дæр. Зæгъæм, мæнæ ацы фæзуаты сагъд ис нуры, хъæдындз, уырыдзы, цæхæра, хъæдур, нас, къабуска æмæ ма дыргъы бæлас кæрдо дæр».

Фæлæ канд халсартæ æмæ дыргътæй фынг бæркадджын нæ уыдзæн. Зджыды нæй, цæх æмæ кæрдзын кæм балхæной, уый.

Зджыдмæ фæндаг гуыргъахъ не схондзынæ, фæлæ дæрддзæф хъæумæ алы бон цæуын зын у, чи зоны уыцы аххосагмæ гæсгæ сæм нæй тагъд æххуысы машинæ дæр.

Фæлæ уæддæр адæм зæрдæ дарынц, тагъд рæстæг фыдæлтыккон зæххы царды рухс кæй фендзысты сæ кæстæртæ дæр, ууыл.