Бæрæгбоны агъоммæ дзуары бынаты расидтысты зиу
Ацы хуыцаубоны нæ республикæйы сбæрæг кæндзысты Хетæджы бон. Бирæазон æгъдаумæ гæсгæ, мингай адæмтæ æртыгай кæрдзынтимæ цæудзысты сыгъдæг къохмæ. Бæрæгбоны агъоммæ дзуары бынаты расидтысты зиу. Фæсивæд куы æфснайдтой, уый федта не сфæлдыстадон къорд.
Быру æмæ бæлæстæ чъырæй сцæгъдын, алфамбылай бафснайын. Хетæджы къохы бæрæгбоны агъоммæ бирæ куыст ис. Æвзонг волонтер Дзбойты Давид ацы бынатмæ фыццаг хатт æрбацыд, 5 азы йыл куы цыд, уæд. Фæлæ ныр дæр ма йæ зæрдыл дары, хистæртæ къохы равзæрды, æгъдауы æмæ традициты тыххæй куыд дзырдтой, уый. Давид куыд зæгъы, афтæмæй йæ фæнды, цæмæй йæ фæлладуадзæн бонтæ пайдаимæ арвита, уый.
Давидимæ ам фæллой кæнынц бирæ волонтертæ æнæхъæн республикæйæ. Сæ сæйраг хæс у, бæлæстæй цы сыфтæ æмæ къалиутæ æрхаудтой, уыдон бафснайын, æмæ сæ чъырæй сцæгъдын.
Ацы аз ам сæвæрдтой ног кърæнттæ, ныссагътой 30 канадæйаг уисхъæды. Бæлæсты ацы хуыз цæры фылдæр. Раст сæм куы зилай, уæд сæ бон у 300 азæй фылдæр фæцæрын. Хъæппæрисджын къорды разамонæг Хъараты Таймураз куыд зæгъы, афтæмæй ахсджиаг у, ахæм мадзæлтты фæсивæд кæй архайы, уый.
Хъараты Таймураз куыд зæгъы, афтæмæй ныридæгæн фесты куыстыты 95 проценты. Фæлæ бæрæгбонмæ алцыдæр уыдзæн цæттæ.
Хыцаубоны ацы ран æрæмбырд уыдзысты бирæ адæм. Кувдзысты Хуыцаумæ, æмæ дзы курдзысты, цæмæй иууылдæр цæрæм сабыр арвы бын.
