филиал вгтрк государственная телерадиовещательная компания “Алания”

Ацы къуыри канал «Россия»-йы райдыдтой киноныв «Операция Мухаббат» æвдисын. Ныхас дзы цæуы Афганистаны хæсты цаутыл. Кинонывы сæйраг хай истой 2016-17-æм азты Мызуры. Ам сарæзтой æмбисонды декорацитæ. Уымæй уæлдай ма бынæттон цæрджытæн уыдис фадат се вæрæн бахæссынæн кинолентæмæ. Зæрдиагæй архайдтой егъау дзыллон сценæты, фæлвæрдтой сæхи салдæтты, афгайнæгты рольты. Æмæ уый цымыдисаг куыд нæ уыд? Зæгъын ма хъæуы уый, æмæ киноныв нæ республикæйы сисыны хъуыды æрцыдис не мзæххон, Цæгат æмæ Хуссар Ирыстоны сгуыхт артист Фидараты Сосланмæ. Ацы киноныв у йæ фыццаг къахдзæф продюсеры хуызы. Фæлæ йæм нырма бирæ хъуыдытæ æмæ бæллицтæ ис. Хъайтыхъты Фатимæ радзурдзæн бæлвырддæр.

Минæты срæмыгъд, æфсæддон техникæйы уынæр, автоматы къæр-къæр. Уыцы æвирхъау зæлтæй бынæттон цæрджытæ æппындæр нæ тæрсынц. Зонынц, нæ республикæйы кæй æрфысым кодта киноныв «Операция Муххабат»ы киноисæн къорд. Кинонывы æвдисынц Афганистаны хæсты æцæг цаутæ. Ирыстоны хæхты фæрцы та ис равдисæн уыцы хæххон бæстæйы миддуне. Дæсны нывгæнджыты руаджы чысыл поселок йæ хуыз аивта, æмæ ныртæккæ у афгайнаг хъæуы тыгъдбыдыр.

Киноныв истой дыууæ мины æхсæрдæсæм азы Мызуры. Ам сарæзтой æмбисонды декорацитæ. Уымæй уæлдай ма Мызуры цæрджытæн уыдис фадат се вæрæн бахæссæн фидæны кинонывмæ. Зæрдиагæй архайдтой егъау дзыллон сценæты, фæлвæрдтой сæхи салдæтты, афгайнæгты ролты. Æмæ уый бынæттон цæрджытæн цымыдисаг куыд нæ уыд?

Режиссер Олег Фомины кино ист у, æцæг чи уыдис, ахæм цаутыл. Æфсæддон ныхмæлæуды райгуырд кинойы хъайтартæ Митя æмæ Аняйы уарзондзинад. Уæвгæ, цард сæм æдзух йæ мидбылты нæ худдзæн. Æрыгон уарзæттæн æрцæттæ кодта бирæ фæлварæнтæ…

Гадзрахатдзинад, уарзондзинад, мæлæт æмæ цард иттæг хорз равдыстой артисттæ. Киноныв Ирыстоны сисыны хъуыды æрцыдис не мзæххон, Цæгат æмæ Хуссар Ирыстоны сгуыхт артист Фидараты Сосланмæ. Ацы киноныв у йæ фыццаг къахдзæф продюссеры хуызы. Уæвгæ, Фидары-фырт куыд зæгъы, афтæмæй йæм нырма бирæ хъуыдытæ æмæ бæллицтæ ис….

Телеканал «Россия»-йы киноныв райдыдтой ацы къуыри æвдисын. Мызуйрæгтæ тынг цымыдисæй æнхъæлмæ кастысты сæхи телеэкрантыл фенынмæ. Æмæ кæд киноисæг къорд Мызурæй раджы ацыд, уæддæр ацы райдзаст бонтæ æнусмæ цæрдзысты сæ мысинæгты.