Уыимæ æрвылбоны фæткмæ гæсгæ кусынц рæвдауæндæттæ
Ацы къуыри комкоммæ ахуырадмæ рацыдысты республикæйы кæстæр кълæсты скъоладзаутæ. Уыимæ æрвылбоны фæткмæ гæсгæ кусынц рæвдауæндæттæ. Хистæр кълæсты ахуырдзаутæн та зонындзинæдтæ лæвæрд цæуынц дæрддзæфмæ. Æрæфы районы ахуырадон уагдæтты куыд æххæссынц уыцы куыстыл, уый базыдта Сосранты Жаннæ, æмæ бакæсæм йæ сюжетмæ.
Куыд æппæт республикæйы, афтæ Æрæфы районы скъолатæ дæр кусынц, эпидемиологон уавæр куыд амоны, ахæм гæнæнтæм гæсгæ. Сырх-Дыгуры скъолайы арæзт æрцыдысты æппæт амæлттæ ахуыргæнджыты æнтысджын куыстæн.
Афтæ цæуынц уроктæ Сырх-Дыгуры скъолайы ахуырдзаутимæ дистанцион хуызы, нырыккон технологитæй пайда кæнгæйæ.
Сырх-Дыгуры скъолайы ахуыр кæны 169 скъоладзауы, уыдонæй 100-йæн зонындзинæдтæ лæвæрд цæуы дистанцион хуызы. Кæстæр кълæсты ахуырдзаутæ та сæ ахуыр хæссынц æрвылбоны фæткмæ гæсгæ. Куыд федтам, афтæмæй сабиты зæрдæмæ тынгдæр цæуы ахуыргæнæгимæ комкоммæ архайын. Æфсæнты Ирлæн тынг бæллыд скъолайы къæсæрæй бахизынмæ. Ныр йæ бæллиц сæххæст, æмæ тыхсы дистанцион ахуырадмæ та куы рацæуой, уыцы хъуыдыйæ.
Цæмæй сывæллæттæ къаддæр рынчын кæной, уый тыххæй скъолайы медицинон кусæг Елеты Анатолий алы райсом дæр лæмбынæг æркæсы сабиты æнæниздзинады уавæрмæ.
Aфтæ æппæт районы скъолаты дæр. Иууылдæр биноныгæй архайынц низ парахат кæнын ма бауыдзыныл, сабитæн та зонындзидтæ раттыныл.
Эпидемиологон уавæр хынцгæйæ, сæ куыст куыд зæрдæргъæвдæй аразынц Æрæфы районы скъолаты ахуыргæнджытæ, медицинон æмæ æндæр кусджытæ, уый у бафæзминаг. Алчи дæр нæ афтæ лæмбынæгæй куы архайа низæй хи æмæ иннæты бахизыныл, уæд уавæрæн æнæ фæхуыздæр уæвæн нæй.
