Куыстытæ цæуынц Терчы былгæрæтты 2 раны – Пашковскийы хиды цур æмæ Цæнгæт хидæй Соляныйы фæрсуынджы онг
Азæй азмæ Дзæуджыхъæуы бакаст ивы хуыздæрырдæм. Ацы аз программæ «Рацарæзт æмæ цъæхфæлыст»-ы стæй национ проект » Горæты æнцонвадат архайд «- мæ гæсгæ куыстытæ цæуынц Терчы былгæрæтты 2 раны – Пашковскийы хиды цур æмæ Цæнгæт хидæй Соляныйы фæрсуынджы онг. Сæйраг мадзæлттæ фесты, баззадысты ма лыстæг куыстытæ. Реставрацигонд цæуы скульптурæ «Дада æмæ йæ фæдон». Ныхасы бар Чехойты Фатимæйæн.
Абухгæ Терк æмæ æнусон хæхтæ ныр бынтон рæсугъдæй разындысты. Рацарæзты фæстæ саив сты асинтæ æмæ дардмæ фæлгæсæн бынат дæр. Бирæ азты цæугæдоны сæрты хидыл иу фарсæй иннæмæ бахизæн нæ уыд. Ныр æй ногæй байгом кодтой фистæгæйцæуджытæн. Кусджытæ ацы фæз æрмæст хæрзвадат не скодтой. Сси ма туристты уарзон бынат дæр. Бындурон арæзт фæрстæ, былгæрæтты ныллæг бырутæ æмæ брусчаткæ. Баивтой алцыдæр. Аив æмæ хæрзвадат асинтæ, сæрмагонд фæндаг велосипедтыл цæуджытæн. Базылдысты газонтæм дæр. Баззадысты ма лыстæг куыстытæ.
Рацарæзтой Терчы былгæрæттæ Пашковскийы хиды фарсмæ дæр. Баивтой ныллæг бырутæ, фæндаджы уæлцъар, сæвæртой нырыккон рухсгæнæнтæ, йе *нæниздзинад хъыгдард кæмæн у, уыцы адæмæн та скодтой пандус. Цæрджыты ныхæстæм гæсгæ, ахæм ивддзинæдтæ хæссынц æхсызгондзинад. Ныр ам адæм сæ уæгъд рæстæг зæрдиагдæрæй æрвитынц.
Фидæнмæ фæнд кæнынц Терчы былгæрæттæм æххæстæй базилын. Сæ дæргъ цыбыр нæу, уымæ гæсгæ куыстытæ цæуынц хайгай.
Иттæг хорз бынат тезгъо кæнынæн æмæ физкультурæйæ архайынæн. Афтæ хонынц цæрджытæ Терчы былгæрæттæ. Сæ аивдзинадæй æмæ рæсугъд бакастæй уыдон бонæй бон фылдæр адæмы æлвасынц сæхимæ.
