Уæрæсейы паддзахадон цирчы компанийы артисттæ æвзист майдан рамбылдтой цирчы аивады 13-æм Æппæтадæмон фестивалы
Бæхты труппæ «Ирыстоны джигитты» дæсныйад хорзыл банымадтой æппæтадæмон конкурсы. Уæрæсейы паддзахадон цирчы компанийы артисттæ, сæ разамонæг Уæрсейы сгуыхт артист Бæдтиаты Арсен, æвзист майдан рамбылдтой цирчы аивады 13-æм Æппæтадæмон фестивалы. Кадджын конкурс арæзт æрцыд Будапешты. «Джигитовкæ – нæ бæстæйы нымад у легендарон жанрыл. Куыстой дзы зындгонд династитæ: Хъантемыратæ, Нугзаратæ, Тугъантæ. Ахæм кадджын æппæтадæмон фестивальты бæхылбадджытæ стыр хæрзиуджытæ кæй райсынц, уый дзурæг у ууыл, æмæ джигитовкæ у уарзондæр аивады хуыз æппæт дунейы». Ахæм хъуыдыйыл хæст у Уæрæсейы цирчы генералон директор Владимир Шемякин. Уымæй дарддæр хорзæхгонд æрцыдысты иннæ артисттæ дæр. Ацы аз фестивалы архайдтой Болгарийы, Белоруссийы, Бразилийы, Венгрийы, Францийы, Швейцарийы, Испанийы, Италийы, Уæрæсейы æмæ æндæр бæстæты минæвæрттæ.
