Ноггонд æрцæудзысты концертон залтæ, репетицитæн агъуыстытæ, стæй сценæйы ифтонггæрзтæ
Аивадæн арæнтæ нæй. Уымæн æвдисæн Октябрьскæйы культурæйы галуан. Кæд бæстыхайы бындурон цалцæг цæуы, уæддæр артисттæ æрмæст репетицитæ нæ кæнынц, фæлæ сæхи цæттæ кæнынц суанг гастрольтæм дæр. Тагъд рæстæг 18 сфæлдыстадон къордæн фæзындзæн нырыккон бынат репетицитæ кæнынæн æмæ сценæйы архайынæн. Бындурон цалцæг райдыдта ацы аз национ проект «Бинонтæ» æххæстгæнгæйæ. Аивад зындзинæдтыл куыд уæлахиз кæны, уый тыххæй радзурдзæн Чехойты Фатимæ.
Ацы кафджыты къорд афæдзы *рдæг йеддæмæ нæма кусы. Национ хореографийы хицæндзинæдтыл ахуыр кæнынц сæдæмæ хæстæг лæппу æмæ чызджы. Нырма уал репетицитæ цæуынц Горæтгæрон районы скъолатæй иуы. Къорды аивадон разамонæг Тедеты Владимиры ныхæстæм гæсгæ, уавæртæ сты хуыздæрхъуаг. Нæй дзы кæсæнтæ, пъол дæр хореографийæн нысангонд нæу. Фæлæ æххæст сты сæйрагæй – ахуырмæ тырнындзинадæй. Сæ бæллиц – ноггонд культурæйы галуаны сценæйы сæ дæсныйад равдисын.
Цæлцæджы рæстæг дæр сфæлдыстадон куыст не *рлæууыд. Артисттæн ссардтой агъуыстытæ репетицитæ кæнынæн. Театралон къорды архайджытæ сæхи цæттæ кæнынц гастрольтæм республикæйы районтæм. Къуырийы кæрон фæлладуадзæн бонты Горæтгæрон районы минæвæрттæ Елхоты равдисдзысты спектакль «Къоста», уымæй ма иу хатт фæнысан кæнындзысты, аивадæн арæнтæ кæй нæй, уый.
Культурæйы галуаны ис 18 сфæлдыстадон къорды. Хор, оркестрон, музыкалон… Архайдтой кæлæддзаг бæстыхайы. Нæ дзы уыд хъармгæнæн æмæ вентиляцийы системæтæ, къæвдаты рæстæг-иу пъадвал донæй байдзаг. Цалцæджы фæстæ культурæйы галуан суыдзæн районы нырыккон аивадон бынат.
Бæстыхайы бындурон цалцæг райдыдта ацы аз. Ноггонд æрцæудзысты концертон залтæ, репетицитæн агъуыстытæ, стæй сценæйы ифтонггæрзтæ. Æппæт куыстытæ культурæйы галуаны нысан кæнынц 3 азмæ фæуын. Бæстыхай бындурон цалцæг цæуы национ проект «Бинонтæ» æххæстгæнгæйæ.
