Беслæны кæртытæй иуы та равæрдтой Италийы тырыса æмæ дзы ныффыстой «Итали, мах стæм демæ!»
Дунейы коронавирусы пандемияйы амæттæгты нымæц ахызт 25 мин адæймагæй фылдæрмæ. Æппæтæй тынгдæр зиан инфекци æрхаста Италийы цæрджытæн. Семæ иузæрдион кæй сты, уый равдыстой Беслæны æмæ Дзæуджыхъæуы цæрджытæ. Сæ хæдзæртты ссыгътой сойын цырæгътæ. Беслæны кæртытæй иуы та равæрдтой Италийы тырыса æмæ дзы ныффыстой «Итали, мах стæм демæ!». Зæрдылдарæн акци арæзт æрцыд социалон хызтæй пайдагæнджыты æмæ Беслæны, Рахизфарсы районы разамынды, стæй Беслæны мадæлты комитеты хъæппæрисæй. Йæ фарс рахæцыд республикæйы фæсивæды хъуыддæгты комитет дæр. Акцимæ се вæрæн бахастой фæсивæдон æмæ æхсæнадон организациты минæвæрттæ, æмæ зæрдæхæлар адæм. Уæ зæрдыл уын æй æрлæууын кæндзыстæм, Италийы коронавирусы амæттæгты номыл акци фыццæгты хсæн 22-æм мартъийы расидти зындгонд журналист Цæголты Олег. Йæ фарс рахæцыдысты йе мкусджытæ, æмæ ацы хъусынгæнинаг апарахат кодтой социалон хызты.