Специалисттæ зæронд асфальты хай баивтой тротуарон плиткæйæ, снысан кодтой фистæгæйцæуджыты ног фæндæгтæ
Беслæны аив кæнынц районы культурæйы Галуаны территори. Куыстытæ цæуынц рæвдз. Специалисттæ зæронд асфальты хай баивтой тротуарон плиткæйæ, снысан кодтой фистæгæйцæуджыты ног фæндæгтæ. Кæронмæ фæхæццæ кæны сæрдыгон сценæ æвæрыны куыст. Уæлдай æргом здæхт цæуы, Беслæнæй Фыдыбæстæйы Стыр хæсты чи фæмард, уыдонæн цыртдзæвæнмæ. Стæй ма фæзындзæн иу ногдзинад – уынджы библиотекæ. Уыдзæн дзы сывæллæттæн ирхæфсæн фæз дæр. Чехойты Фатимæйæн ныхасы бар.
Беслæны культурæйы галуаны алфамблай территори рацаразынхъуаг рагæй уыд. Ацы сæрды дзы райдыдтой цалцæггæнæн куыстытæ. Зæронд асфальт баивтой плиткæйæ. Сбæрæг кодтой ног къахвæндæгтæ. Уæлдай цæстдард цæуы мемориалон хаймæ. Аивгонд æрцæудзæн, Фыдыбæстæйы Стыр хæстæй чи нал сыздæхт, уыдоны цыртдзæвæн æмæ йæ алыварс территори. Ивддзинæдтæ цæрджытæн хæссынц æхсызгондзинад.
Сывæллæттæн сараздзысты нырыккон ног хъазæн фæз. Фæзындзæн дзы машинæтæн лæууæн бынæттæ, байгом дзы кæндзысты чысыл бизнесы куыстуæттæ, цæмæй районы амалхъомдзинад уæрæхдæр кæна. Цæрджытæн цымыдисаг у ногдзинад – культурон мадзæлттæ кæм цæудзысты, ахæм сæрдыгон сценæйы арæзтад. Æнхъæлмæ кæсынц уынджы чиныгдоны фæзындмæ дæр. Сыгъдæг уæлдæфы кæсынæн æмæ фæлладуадзынæн равзæрстой фæз Беслæны астæу. Сæвæрдзысты дзы бандæттæ æмæ рухсгæнæнтæ. Æхсæнадон тыгъдад бонæй бон аивдæр кæны.
Районы культурæйы галуаны территори суыдзæн æнцонвадат тыгъдад алы кары адæмæн дæр. Куыстытæ цæуынц национ проект «Инфраструктурæ – цардæн» æххæстгæнгæйæ. Рацарæзт фæткмæ гæсгæ фæуыдзæн афæдзы кæрон.
