Æппæт куыстытæ цæуынц, паддзахадон программæ «Культурæйы рæзт» æххæст кæнгæйæ
Беслæны ацы азы кæронмæ фæнд кæнынц культурæйы Хæдзары рацарæзт кæронмæ фæуын. Аразджытæ ныридæгæн базылдысты пъолтæм æмæ асинтæм, сæвæрдтой ног рудзгуытæ æмæ дуæрттæ, хъармгæнæн æмæ трансформаторон дæлстанцæ. Уымæй дарддæр бауагътой инженерон коммуникацитæ. Æппæт куыстытæ цæуынц, паддзахадон программæ «Культурæйы рæзт» æххæст кæнгæйæ. Бæлвырддæр хабæрттæ радзурдзæн Фидараты Маринæ.
Ивгъуыд азы августы Беслæны райдыдта раздæры Фæсивæды Галуаны рацарæзт. Объекты фæллой кæнынц 70 адæймаджы онг. Уыдзæн дзы культурæйы Хæдзар. Ныртæккæ бахæццæ сты кæронбæттæн куыстытæм. Аив кæнынц алфамбылай территори. Уымæй дарддæр цæуынц мидæггаг æмæ электромонтажон куыстытæ, æвæрынц плиткæ, вентиляцион системæ. Фæстæдæр сног кæндзысты бæстыхайы æддаг бакаст.
Зæгъын хъæуы уый, æмæ бæстыхайыл цæуы 90 азы. Уыцы мгъуыдмæ дзы ахæм егъау рацарæзт никуы уыд. Рæстæг куыд цыди, афтæ сси бæстон базилинаг. Аразджытæ сфидар кодтой къултæ, бындур, колоннæтæ, асинтæ æмæ фæзтæ. Бамбæрзтой ма бæстыхайы сæр æмæ сæвæрдтой æппæт инженерон коммуникацитæ. Уымæй дарддæр сæвæрдтой ног рудзгуытæ, дуæрттæ, сантехникæ æмæ хъармгæнæн системæ. Ноггонд культурæйы Хæдзары кусдзысты национ, нырыккон æмæ классикон кафты секцитæ. Вокалон æмæ музыкалон инструменттыл цæгъдыны къордтæ. Стæй ма дзы арæзт æрцæудзæн концертон зал 250 бынатæн.
Культурæйы хæдзары чъылдыммæ та аив кæнынц сквер. Фæллойгæнджытæ дзы ныридæгæн сæвæрдтой рухсгæнæнтæ æмæ плиткæ. Нысантæм гæсгæ ма фæнд кæнынц территорийы Хетæгкаты Къостайы цыртдзæвæн сцалцæг кæнын. Кæрты ма ис фонтан. Проектмæ гæсгæ йæ рацарæзт уыдонмæ нæ хауы, фæлæ йæ подрядон организацийы минæвæрттæ фæнд кæнынц сæхи фæрæзтæй сцалцæг кæнын. Уæвгæ куыстытæ цæуынц бæлвырд фæткмæ гæсгæ. Культурæйы Хæдзары рацарæзт фæуыдзæн ацы азы кæрон.
