Бынæттон цæрджытæ ацы цаумæ бирæ азты æнхъæлмæ кастысты
Беслæны БМК-йы культурæйы хæдзары ног истори райдыдта бæрæгбоны концертæй. Бынæттон цæрджытæ ацы цаумæ бирæ азты æнхъæлмæ кастысты. Реконструкцимæ гæсгæ сног кодтой æрмæст бæстыхай нæ, фæлæ ма ифтонггæрзттæ дæр. Бæлвырддæр радзурдзæн Хъалæгаты Надеждæ.
Ацы ныхæстæ цыма ивгъуыдæй фидæнмæ ныстуан сты, уый хуызæн – баиу кæнын æмæ бахъахъхъæнын 90 азы истори. Кæддæр фæсивæды галуан, абон та БМК-йы ноггонд культурæйы хæдзар. Сталинаг ампир ам бæрæг дары алы лыстæг хайы дæр. Йæ барельеф та уазджытыл æмбæлы фойейы. Реконструкцийы рæстæг егъау куыстытæ æххæстгонд æрцыд. Бирæ элементтæ уыдысты реставраторты къухты.
Культурæйы хæдзары реконструкцимæ бавнæлдтой 2023-æм азы августы. Уый размæ 9 азы онг афтид уыд. Бæстыхайы сæр ныккалд æмæ историон агъуыстытæ заууатмæ цыдысты. Объект бахауд Беслæны социалон-экономикон рæзты программæмæ. Специалисттæ сфидар кодтой бындур æмæ къултæ, баивтой хæдзары сæр æмæ æппæт коммуникацитæ, сæвæрдтой дуæрттæ æмæ рудзгуытæ, хуызистытæм æмæ цæрджыты мысинæгтæм гæсгæ сæххæст кодтой аивгæнæн куыстытæ.
Культурæйы хæдзары ног истори райдыдта бæрæгбоны мадзалæй. Æрбамбырд сты микрорайоны цæрджытæ. Ацы ахсджиаг культурон цауы фæдыл адæмæн раарфæ кодта Хицауады сæрдары хæдивæг Платы Альбинæ.
Ныртæккæ ма культурæйы хæдзары цæттæ кæнынц æххæстæй кусынмæ райдайынмæ, лыггонд цæуынц организацион фарстатæ. Реконструкцимæ гæсгæ сног кодтой æрмæст бæстыхай нæ, фæлæ ифтонггæрзтæ дæр. Балхæдтой нырыккон кусæнгæрзтæ, стæй сфæлдыстадон къордты архайынæн музыкалон инструменттæ.
Кусæнуаты ис чысыл концертон зал дæр, стыр зал алыхуызон кæфтытыл ахуыр кæнынæн, вокалон секцитæн æмæ фидæны нывгæнджытæн агъуыстытæ. Ам ма фæнд кæнынц хи музей дæр байгом кæнын, ныр ма уал экспозици ис æндæр кусæнуаты. Уыцы иу рæстæг цæуы штаты комплектаци, кусджыты иу хай райстой. Фæндты ма ис азы кæронмæ культурæйы хæдзары сценæйы равдисын комедион спектакль. Ам фæнд кæнынц рагон традици сног кæнын дæр – бонæй мультфильмæ, изæрæй та – кинонывтæ æвдисын.
