Уымæн æмæ сын фадат ис канд чингуыты дунемæ бахауынæн нæ, фæлæ ма сфæлдыстадон куыст кæнынæн дæр
Чиныг кæсыны уæгъдибар зонæ. Беслæны фæзынд фыццаг модулон библиотекæ. Æппынæдзухдæр æм цæуынц сывæллæттæ. Уымæн æмæ сын фадат ис канд чингуыты дунемæ бахауынæн нæ, фæлæ ма сфæлдыстадон куыст кæнынæн дæр. Ацы бынат ныридæгæн бынæттон цæрджытæ бауарзтой. Библиотекæйы куыстимæ базонгæ не сфæлдыстадон къорд дæр, æмæ бæлвырддæр хабæрттæ радзурдзæн Бокоты Виктория.
Мидбылхудт æмæ цымыдисаг цæстæнгас. Афтæмæй фæцæуынц ахуыртæ Рахизфарсы районы библиотекæйы. Нæ республикæйы нырма у иунæг ахæм моделон библиотекæ, æмæ фæзынд Беслæны 2019-æм азы. Уый сын бантыст, национ проект «Культурæ»-йы конкурсы кæй фæуæлахиз сты, уый фæрцы.
Афтæ ног библиотекæ сси сфæлдыстады рæзты центр, æмæ дзы фæзындысты чиныг кæсæн зонæ, индивидуалон куысты æмæ сæрмагондæй сывæллæттæн зонæтæ. Техникон ифтонггæрзтæ дæр дзуапп дæттынц нырыккон домæнтæн – компьютертæ, ридертæ, графикон планшеттæ. Фадат дзы ис нырыккон базæтæм æмæ электрон библиотекæтæм бацæуынæн дæр. Алы бон ардæм æрбацæуынц 20-30 адæймаджы.
Моделон библиотекæты рæстæгæй-рæстæгмæ арæзт цæуынц алыхуызон мадзæлттæ. Бæлвырддæр та тематикон литературон изæртæ æмæ фембæлдтытæ. Фæсивæды патриотон хъомыладыл куыст та у сæ сæйрагдæр нысантæй иу. Хъуысаты Риммæ ацы библиотекæмæ цæуы 40 азæй фылдæр.
Библиотекæйы кусджытæ ацыдысты квалификаци фылдæргæнæн курсытæ. Уымæй дарддæр архайынц хи проекттæ аразыныл, æмæ фæархайынц æппæтуæрæсеон конкурсты.
Библиотекæйы фонды ис 134 мин экземплярæй фылдæр. Фæстаг æртæ азмæ библиотекæ фæхъæздыгдæр 4 мин чиныгæй фылдæрæй. Æмæ ууыл библиотекæйы кусджытæ æрлæууынмæ нæ хъавынц.
