Сæрмагондæй та, уынгты æнæ цæстдардæй чи рацу-бацу кæны, ахæм хъомты
Цымыдисаг ногдзинад. Беслæны иваргæнæн лæууæнмæ ныр æрмæст машинæтæ не рвитынц, фæлæ ма стурвос дæр. Сæрмагондæй та, уынгты æнæ цæстдардæй чи рацу-бацу кæны, ахæм хъомты. Иваргæнæн фермæйы фос дарынæн æппæт уавæртæ дæр ис. Фæлæ уым цы рæстæг арвитой, уый тыххæй хицауы бахъæудзæн бафидын. Уыимæ ивар чысыл нæу.
Æнæхъæн кордтæй æмæ сæ кæм бафæнда, уым. Афтæ хизынц хъомтæ Беслæны. Зиан хæссынц газонтæн, хæрынц бырæттæ. Хауæццæгтæй цы хъуг аходы, уый æхсыр, æнæмæнг, зæрдæмæдзæугæ нæу. Æмæ уый иунæг лыггæнинаг фарста нæу. Стурвос рацæуы фæндæгтæм, æмæ афтæмæй сæвзæрынц тæссаг уавæртæ. Фæндаггон фæткæвæрд кæй халынц, уый тыххæй ис бæрнондзинад. Дзуапп дæттынц хæдзарон фосы хицæуттæ. Фæлæ бафхæрыны размæ уал, хъомты арвитынц иваргæнæн лæууæнмæ. Ацы хъуыддаг сæххæст кæныны нысанимæ горæты администраци аразы рейдтæ.
Ацы фермæйы хъуццытыл куыд закъонхалджытыл нæ, фæлæ куыд уазджытыл сæмбæлынц. Ам сын ис æппæт уавæртæ. Æмбæрзт агъуыст, холлаг, ветеринары æркаст æмæ ма суанг хъугдуцджытæ дæр.
Фæлæ стурвосы ахæм уавæрты дарын аслам хъуыддаг нæу. Цæрæгойты хицæутты бахъæудзæн æрмæст административон ивар бафидын нæ, фæлæ ма хъомты дарыны хæрдзтæ дæр.
Хъомты афтæ дарын афæдзы рдæгæй фылдæр администрацийæн йæ бон не суыдзæн. Уыцы рæстæгмæ хицау куы нæ фæзына, уæд цæрæгойы ратдзысты фæкæсынхъуаг кæнæ бирæсывæллонджын бинонтæн.
