Ног хæдзæртты цур лыггæнинаг у рухсы фарста, уæдæ фæндæгтæ дæр сты æркæсинаг
Беслæны нартхоры комбинаты районы цæрджытæ æвзарынц зындзинæдтæ. Ног хæдзæртты цур лыггæнинаг у рухсы фарста, уæдæ фæндæгтæ дæр сты æркæсинаг. Афтæмæй та администрациимæ ацы лæггæдты тыххæй контракт раджы бафыстой. Зæронд арæзтæдты æмбырд кæнынц дзæгъæл куыйтæ æмæ æндæр цæрæгойтæ. Бырæттæ пырх кæнынц фæндæгтыл. Горæты администраци архайы уавæр сраст кæныныл, фæлæ хъуыддаг нырма лæууы йæ бынаты. Бæлвырддæр радзурдзæн Касаты Наирæ.
Ацы цæрæгойтæ æппынæдзух хизынц хибарæй. Фыййау сын нæй. Районы цæрджытæ хъаст кæнынц, æвæгæсæг фос бырæттæ кæй пырх кæнынц, уымæй.
Микрорайоны уынгты нæй рухсытæ. Уæдæ кæртытæм бацæуæнты дæр талынг. Изæрыгон уынгтæ рухс кæнынц, æрмæстдæр хæдзæртты цур цы рухсгæнæнтæ ис, уыдонæй. Афтæмæй та дзы дзæгъæл куыйтæй ацæуæн нæ вæййы. Ныййарджытæ тæрсынц сывæллæтты дуканимæ рауадзын дæр. Уæдæ скъоламæ фæндаг дæр æдас нæу. Асфальт дзы нæй йæ райдианæй дæр. Фæндæгтæ дзыхъхъытæ. Къавда бон та дзы ахæм цадтæ вæййы, æмæ фæндаджы сæрты ахизæн дæр нæ вæййы.
Сыхаг кæрты асфальт ис, фæлæ коммуникацитæ куы ивтой, уæд æй скалдтой. Ног асфальт та дзы нæма сæвæрдтой.
Ацы микрорайон сарæзтой, кæлæддзаг хæдзæрттæй кæй раивтой, уыдонæн. Ног цæрæнуæттимæ цæрджытæм фзынди ног лыггæнинаг фарстатæ дæр. Тыхджын дымгæтæ систой хæдзары сæр. Куыддæрты йæ сраст кодтой, фæлæ фæздæгуадзæнтæ куыд æмбæлы, афтæ конд не рцыдысты. Цæрджытæ сæ хъаст бахастой Беслæны администрацимæ.
Бæстыхæйтты хсæн зæронд арæзтæдтæ нæма райхæлдтой. Раздæр уыдысты, кæлæддзаг хæдзæртты чи царди, уыдоны. Ныр дзы æрæмбырд вæййы æнæуаг цард чи кæны, ахæм адæм, сарæзтой дзы бырондон. Ардæм сывæллæттæ æрбацæуынц хъазынмæ, уый та æдас нæу. Беслæны администраци дыууæ азы размæ зæрдæ бавæрдта арæзтæдтæ акалынæй, сæ бынаты та сын гаражтæ саразын. Фæлæ нырма уавæр у раздæрау. Арæх дзы æрцæуынц зингсирвæзтытæ дæр.
Фæстаг рæстæгмæ у æртыккаг зынгсирвæзт. Артæн йæ бон бахизæн у сыхаг арæзтæдтæм, уый та йæ фæстæ хорз хъуыддæгтæ нæ расайдзæн.
Микрорайоны ис 40 сывæллонæй фылдæр. Хъазæн фæзмæ сæ уадзынц æрмæстдæр ныййарджыты цæстдардæй. Хъазæн фæзмæ хъæуы базилын, домæнтæн дзуапп нæ дæтты йæ уæлцъар дæр. Ныр сывæллæттæ фæхъазынц дурджын зæххыл. Микрорайоны цы къуылымпыдзинæдтæ ис, уыдоны тыххæй Беслæны администраци хорз зоны. Дзæгъæл куыйтæн нысан кæнынц питомник саразын. Иннæ æркæсинаг фарста дондзæуæнты системæ. Ууыл дæр хъуамæ бакусой. Ныртæккæ æвзарынц, хæдзары сæр чи аивдзæн, ахæм подрядчик. Сæрмагонд программæмæ гæсгæ хæдзæрттæ бирæтæ райстой, фæлæ цæмæй зæронд бæстыхæйттæ райхалой, уый тыххæй та рæстæг хъæуы.
Администрацийы зæгъынц, микрорайоны фæндаг сараздзысты иннæ азы райдианмæ, зæххы бынты коммуникацитæ æвæрд куы æрцæуой, уæд.
Ам нысан кæнынц культурæйы Галуан саразын дæр. Рацараздзысты доныбылгæрон æмæ фæлладуадзæн фæз. Æппæт ногдзинæдтæ кæронмæ фæуыдзысты 2024-æм азы кæронмæ.
