Лæмбынæг куыст цæуы, объект куыд у, афтæмæй бахъахъхъæныныл
Беслæны реставраци кæнынц фыццаг мемориалон скъола. Лæмбынæг куыст цæуы, объект куыд у, афтæмæй бахъахъхъæныныл. Уый тыххæй Цæгат Ирыстонмæ ссыдысты специалисттæ бæстæйы алы регионтæй. Æппæт куыстытæ æххæстгонд цæуынц наукон-реставрацион проект «Беслæны намыс»-мæ гæсгæ. Бæлвырддæр хабæрттæ радзурдзæн Хъайтмазты Дзерассæ.
Беслæны фыццаг скъолайы спортзал алы адæймагæн дæр рагæй у рысты бынат. Уæвын дæр дзы зын у, æнæхъæн боны дæргъы та кусын, уымæй уæззаудæр. Ольга Соколова у уæлдæр къæпхæны нывгæнæг-реставратор. Йæ цæстысыгтæ уромгæйæ, Беслæны мадæлтæн дзуры мемориалон скъолайы цы реставрацион куыстытæ сæххæст кодтой, уый тыххæй. Йемæ Цæгат Ирыстонмæ ссыд 23 специалисты Мæскуыйæ, Санкт-Петербургæй, Томскæй, Красноярскæй, Мæскуыйы облæстæй, Псковæй æмæ Вологдæйæ. Бафæндыд сæ, се вæрæн бахæссын культурон намысы объект бахъахъхъæнынмæ.
Специалистты сæйраг хæс у, скъолайы цы къултæ баззад, уыдон штукатуркæйæ сфидар кæнын. Реставратортæ, архитектортæ, инженертæ æмæ нывгæнджытæ кусын райдыдтой 15 сентябры. Уыцы рæстæгмæ сын чысыл нæ бантыст. Сыгъд хъайвантæ рыгæй ссыгъдæг кодтой, æмæ сæ байсæрстой сæрмагонд таддагæй. Уый фæрцы ма афтæмæй фæлæудзысты æппынкъаддæр 10 азы. Зындæр у къултимæ кусын. Специалисттæ лæмбынæг архайынц алы лыстæг хай дæр бахъахъхъæныныл.
Æппæт куыстытæ æххæстгонд цæуынц наукон-реставрацион проект «Беслæны намыс»-мæ гæсгæ. Ис ын цалдæр къæпхæны: скъолайы хæлд корпус сног кæнын, территори саив кæнын, фæлæ, фыццаджыдæр, стыр æргом здæхт цæуы, хъахъхъæд чи æрцыд, уыцы бæстыхайы корсервацимæ. Культурон-патриотон центр саразыны проект царды уадзынц Æппæтуæрæсеон патриотон реставрацион змæлды штабы хъæппæрисæй Цæгат Ирыстоны Хицауадимæ, Уæрæсейы реставраторты Цæдисимæ æмæ компани «СКИФОС-РСК»-имæ. Æппæт куыстыты фæдыл ныхас цыд «Беслæны мадæлты» комитетимæ.
Реставрацийы паддзахадон заказгæнæг у ресепубликæйы арæзтады æмæ архитектурæйы министрад. Æппæт куыстытæ æххæстгонд цæуынц пъланмæ гæсгæ.
