Ууыл ныхас цыд социалон фарстаты фæдыл æмбырды
Бинонты аз æххæст кæнгæйæ, Цæгат Ирыстоны фæнд кæнынц бинонты бирæвæрсыг центры хайад байгом кæнын. Ууыл ныхас цыд социалон фарстаты фæдыл æмбырды. Амыдта йæ Сергей Меняйло. Фæллойы æмæ социалон рæзты министр Айдарты Алинæ куыд радзырдта, афтæмæй хайад байгом уыдзæн Дзæуджыхъæуы Промышленнон районы комплексон лæггæдты центры. Муниципалон скондты сæргълæуджытæн бахæс кодтой сбæлвырд кæнын, районты ахæм бирæвæрсыг центртæ хъæудзысты, æви нæ, уый. Уæ зæрдыл уын æрлæууын кæндзыстæм, бинонты бирæвæрсыг центр байгом кодтой 2023-æм азы декабры. Æмбырды бæстон æрныхас кодтой социалон политикæйы фарстатыл. Уæрæсейы Президенты Указмæ гæсгæ, куыд æппæт бæстæйы, афтæ Цæгат Ирыстоны дæр ныффидар кæндзысты бирæсывæллонджын бинонты статус. Лæвæрд цæудзæн, æртæ, кæнæ фылдæр сывæллæттæ кæм хъомыл кæнынц, ахæм бинонтæн. Фадат сын уыдзæн алывæрсыг социалон æххуыс исынæн. Æппæт хъуыддæгтæ хыгъд цæудзысты профилон министрады. Ивгъуыд аз нæ республикæйы æртыккаг æмæ фылдæр сывæллæттæн æххуыс райстой 7 мины æмæ 400 бинонтæ. Фыццаг сывæллоны райгуырдæн, кæнæ хъомыл кæнынмæ чи райста, ахæм фиддонтæ райстой 7 мины æмæ 500 бинонтæ. Уымæй дарддæр фæрæзтæ радих кæндзысты социалон æххуысы ног мадзалæн. Уыцы фæндон бахаста Цæгат Ирыстоны Сæргълæууæг Сергей Меняйло. Бæлвырддæр та – 26 азы онг кæуыл цæуы, ахæм ныййарджытæн фыццаг сывæллонæн уыцы иу хатт бафиддзысты 50 мин сомы. Уæдæ ацæргæ адæмæн та ахадгæ æххуыс цæудзæн, национ проект «Демографи»-йы федералон проект «Хистæр кар» æххæст кæнгæйæ. Уæлдай æргом здахдзысты сæрмагонд æфсæддон операцийы архайджыты бинонтæм. Регионы разамонæг се ппæты зæрдыл æрлæууын кодта, куыд ахсджиаг у æмбарынгæнæн куыст кæнын, æххуыс райсыны фæдыл. Ныхас ма цыд сæрдыгон дзæбæхгæнæн кампани æмбæлгæ уагыл арвитыныл.
