Бирæтæ ма хорз хъуыды кæнынц фарон бирæгътæ хъæутæм куыд фæцахуыр сты, уый. Цæрджытæн цагътой сæ фос. Адæм уыдысты тасы. Рæстæг рацыд, фæлæ уæдæй абонмæ уавæр хуыздæр нæ фæци. Ацы зымæг дæр та сырдты фенæн ис хъæуы уынгты.
Хъæрджынты Хъасполат фос рагæй дары, фæлæ йын дзы хъæддаг сырдты аххосæй фæхъæуа, уый фыццаг хатт бавзæрста.
Цæхойты Володя та ныр дæр дис кæны, бирæгътæ хъæумæ куыд уæндонæй æрбацыдысты, ууыл. Фæлæ, æвæццæгæн, хæдзарон фосы тæф сæ фындзыл куы ауайа, уæд ма кæцы бирæгъ бауромдзæн йæхи. Æмæ арæх уазджытæ систы Бирæгъзæнджы.
Бирæгъты цæуыннæ марынц, зæгъгæ, фарстайæн ис цыбыр дзуапп. Бирæгъзæнг Цæгат Ирыстоны фæдзæхст бынатмæ хæстæг кæй у, уымæ гæсгæ сын сырдтæ марыны æмæ цуаны цæуыны бар нæй. Уымæй уæлдай ма хæцæнгарз райсынæн дæр хъæуы æмбæлгæ гæххæттытæ бацæттæ кæнын æмæ домæнтæ сæххæст кæнын.
Бирæгъты нымæцыл æфты азæй-азмæ. Зымæгон сын вæййы хъазæн рæстæг æмæ иу сылбирæгъ æрхæссы 4-8 лæппын бирæгъы. Æмæ зæгъæн ис – уавæр кæны æвзæрдæр. Ныр ма уал бирæгътæ лæбурынц æмæ цæгъдынц фос. Адæм сæ фыртыхстæй цы фæуой, уый нæ зонынц. Ис сæм фæндон.
Къорды уæнгтæн бирæгътæ марынæн бар куы уа, мызд сын куы фидой, транспорт сæм куы уа, хæцæнгарз – уæд сырдтæ кæм сты, уыцы рæттæм тагъддæр хæццæ кæндзысты, сæ пайда дæр фылдæр уыдзæн. Æндæр хъæуты цы иугай цуанæттæ ис, уыдон сыл кæд æмбæлынц, уæддæр не ххæсынц.
Æрдæгхæрд фосмæ кæсгæйæ, адæм сагъæсы бацæуынц. Сæ сывæллæттыл хъуыды кæнгæйæ, сæ мæтæн кæрон нал вæййы. Кæдмæ афтæ уыдзæн, уый та зын зæгъæн у.
Зыхъуаты Жаннæ
