Стыр æргом аздæхтой национ проекттæм
Республикæйы разамонæг Битарты Вячеслав æмæ Æрыдоны районы муниципалон сконды сæргълæууæг Тотраты Владислав бæстон æрныхас кодтой Æрыдоны районы социалон-экономикон рæзтыл. Стыр æргом аздæхтой национ проекттæм. Ацы аз районы федералон программæтæ æххæст кæнгæйæ, нысан кæнынц 25 социалон ахсджиаг объекты саразын æмæ рацаразын. Сæ иу у проект «Спорт – норма жизни». Уый æххæстгæнгæйæ райдыдтой ног спортивон комплекс аразын. Дыууæуæладзыгон бæстыхайы уыдзæн 5 мин квадратон метрæй фылдæр. Нырыккон комплексы арæзт цæудзысты ахуыргæнæн, спортивон æмæ культурон мадзæлттæ. Уымæй дарддæр — тренировкæтæ æмæ спортивон ерыстæ. Куыстыты хæрзхъæдзинадмæ цæудзæн бæстон видеоцæстдард. Объект эксплуатацийы раттынмæ хъавынц 2021-æм азы декабры. Тотраты Владисалв куыд загъта, афтæмæй рæхджы байгом уыдзæн ног амбулатори Красногоры. Иу радмæ дзы лæггад кæндзысты 50 пациентæн. Хъæдгæроны та рацараздзысты доны хызæг. Фембæлды ма стыр æргом аздæхтой, Битарты Вячеслав Æрыдоны районы цæрджытимæ ныхасы фæстæ цы амынддзинæдтæ радта, уыдон куыд æххæстгонд цæуынц, уымæ.
