Традицимæ гæсгæ мадзал арæзт æрцыд Уæрæсейы мыхуыры бонмæ
Битарты Вячеслав схорзæхджын кодта республикæйы сæргълæууæджы премийы лæуреатты. Традицимæ гæсгæ мадзал арæзт æрцыд Уæрæсейы мыхуыры бонмæ. Хæрзиуджыты – сæрмагонд статуеткæтæ æмæ æхцайы премитæ Республикæйы сæргълæууæг Битарты Вячеславы къухтæй райстой паддзахадон телерадиокомпани «Алани»-йы минæвæрттæ дæр. Радиойы службæйы сæргълæууæг Джыккайты Заремæ, æмæ телеуынынады службæйы редактор Сосранты Жаннæ хуыздæртæ систы номинаци «Кад æмæ намыс»-ы, радиойы службæйы сæйраг редактор Черчесты Зæринæ та хорзæхгонд æрцыд номинаци «Фидæны траектори»-йы, радиоэфиры разамонæг Налдыхъуаты Зæлинæ та преми райста номинаци «Афæдзы темæ Уæрæсейы». Зæгъын хъæуы уый, æмæ æппæты фылдæр дипломтæ кæй райстой телерадиокомпани «Алани» – йы минæвæрттæ. Афæдзы премийы лауреаттæ ма систы портал «Градус Про», телеканал «Осетия-Ирыстон», Газеттæ «Заря» æмæ «Хуссар Ирыстон», организаци «Стыр ныхас» æмæ Уæрæсейы æнæнхъæлæджы уавæрты министрады регионалон управленийы минæвæрттæ.
Газет «Рæстдзинад»-ы коллективæн та лæвæрд æрцыд Уæрæсейы журналистты Цæдисы кады грамотæ, йæ 25 минæм номыр мыхуыры кæй рацыд, уый тыххæй. Кадджын уавæры сын æй радта Цæгат Ирыстоны журналистты цæдисы сæрдар Хъуысаты Тимур. «Рæстдзинад»-ы фыццаг номыр мыхуыры рацыд 14-æм мартъийы 1923-æм азы.
