Къамисы уæнгтæ æрныхас кодтой Ног азы æмæ Цыппурсы бæрæгбæтты рæстæг æдасдзинады мадзæлттыл.
Цæгат Ирыстоны сæргълæууæг Битарты Вячеславы разамындæй уыд терроризмы ныхмæ къамисы æмæ Оперативон штабы æмбырд. Къамисы уæнгтæ æрныхас кодтой Ног азы æмæ Цыппурсы бæрæгбæтты рæстæг æдасдзинады мадзæлттыл. Уымæй дарддæр стыр æргом аздæхтой экстремизмы проифлактикæмæ æмæ нæ республикæйы нациты хсæн ахастдзинæдты рæзтмæ, стæй хатдзæгтæ скодтой антитеррористон къамисы 2019-æм азы куыстæн æмæ сæвæрдтой фидæнмæ нысантæ. Мидхъуыддæгты министрады æхсæнадон барад хъахъхъæныны пъæлицæйы хицауы хæдивæг Альберт Сабанаев скодта бæстон доклад, бæрæгбæтты рæстæг фылдæр адæм кæм æмбырд кæнынц, уыцы бынæтты терроризмы ныхмæ къамис æдасдзинады мадзæлттæ куыд æххæст кæны, уый тыххæй. Афæдзæй-афæдзмæ бæрæгбоны мадзæлттæ кæнынц фылдæр. Ацы аз дæр Дзæуджыхъæуы æмæ республикæйы районты арæзт æрцæудзысты культурон-ирхæфсæн бæрæгбæттæ. Архайдзысты дзы куыд кæстæртæ, афтæ хистæр кары адæм дæр. Уымæ гæсгæ мидхъуыддæгты министрады кусджытæ 31-æм декабрæй – 9-æм январы онг кусдзысты карздæр фæткмæ гæсгæ. Уыдзысты 4 мин пъæлицæйаджы, Уæрæсейы гвардионтæ æмæ бархион адæмон дружинæтæ. Республикæйы цыди информацион акци «Æхсæнадон æдасдзинады къуыри». Уый æххæст кæнгæйæ, ахуыргæнæндæтты уыдысты лекцитæ æмæ æдасдзинады уроктæ. Битарты Вячеслав фæсидт æппæт тыхы структурæты минæвæрттæм æмæ хицаудзинады оргæнты кусджытæм, цæмæй стыр æргом аздахой барадхъахъхъæнæн мадзæлттæм Ног азы фæлладуадзæн бонты рæстæг. Æмбырды ма доклад скодта республикæйы Сæргълæууæджы æххуысгæнæг, антитеррористон къамисы аппараты разамонæг Олег Баранов. Куыд загъта, афтæмæй æмтгæй райсгæйæ, Цæгат Ирыстоны территорийы оперативон уавæрмæ цæуы бæстон цæстдард.
