Йæ дæргъ у 57 километры.
Республикæйы сæргълæууæг Битарты Вячеславы уынаффæмæ гæсгæ фарон райдыдта Мæздæджы районмæ фæндаджы арæзтад. Йæ дæргъ у 57 километры. Уыдонæй 20 километры фесты арæзт. Алы бон дæр фæндаггонтæ сæвæрынц километрæй фылдæр. Цы бантыст ацы бонмæ саразын, уый федта Бокоты Виктория
Дзæуджыхъæу æмæ Мæздæг чи бæтдзæн уыцы фæндаджы арæзтад райдыта фарон июлы. Уæд куыстытæн скодтой се мбис. Сцалцæг кодтой 3 хиды, сæвæрдтой дондзæуæн хæтæлтæ, æмæ акалдтой хъæд. Ныртæккæ æвæрд цæуынц донæмбырдгæнæнтæ æмæ асфальты дыккаг уалцъар.
Объект у егъау. Куыстытæ уыцы иу рæстæг цæуынц цалдæр уаццагыл. Иннæ къæпхæн та у – фæндаджы нысантæ, рухсгæнæнтæ æмæ сфетофор сæвæрын. 3-æм категорийы фæндаг дзуапп дæтдзæн æдасдзинады домæнтæн.
Фæлæ Зилгæмæ хæстæг куыстытæ æрлæууыдысты. Ам федералон нысаниуæджы культурон объекты фæдыл цалынмæ сæрмагонд уагæвæрд не сфидар кæной, уæдмæ дзы кусæн нæй.
Фæндаг та аразын райдытой Цæгат Ирыстоны сæргълæууæг Битарты Вячеславы уынаффæмæ гæсгæ. Федералон фæрæзтæй радих кодтой 2 миллиард сомы. Уыдонæй 300 милуан сомы бакуыстой фарон. Нысангонд куыд у, афтæмæй ацы азы кæронмæ хъуамæ фæндаг байгом уа. Йæ фæрцы Дзæуджыхъæуæй Мæздæгмæ цæуæг бæлцон фæстауæрц кæны 50 минуты.
