Данæ у космонавтикæйы скъолайы ахуыргæнинаг, паддзахадон корпораци Роскосмосы æмæ Фыццæгты змæлды Æппæтуæрæсеон проекты уæлæхиздзау
Космос æнхъæлмæ кæсы! Ракетæ куыд стæхы, уый фенын, æмæ Космосы Æппæтадæмон Станцæйы экспедицийы программæмæ æркæсын тагъд рæстæджы йæ бон суыдзæн Боциты Данæйæн. Данæ у космонавтикæйы скъолайы ахуыргæнинаг, паддзахадон корпораци Роскосмосы æмæ Фыццæгты змæлды Æппæтуæрæсеон проекты уæлæхиздзау. Цæгатирыстойнаг чызгæн хорз фадат фæуыдзæн Байконур фенынæн.
Сусæгдзинæдтæй дзаг, йæ рæсугъддзинадæй дисы чи *фтауы, уыцы æнæкæрон тыгъдадмæ фæхæстæгдæр Боциты Данæ. Космосмæ цымысдзинад уымæ раджы фæзынд, райдайæн скъолайы ахуыргæнгæйæ. Уæдæй нырмæ йын æнцой нæ дæттынц æрттиваг стъалытæ æмæ æнæиртæстгонд планетæтæ. Данæмæ уыцы уарзондзинад йæ мадмæ гæсгæ фæзынд. Йæ ныййарæг у космонавтикæйы скъолайы ахуыргæнæг.
Архайдта æппæуæрæсеон проект «Фыццæгты космосон экпедици»-йы. Уый руаджы ацæудзæн Данæ космодром Байконурмæ. Уым хъуамæ фена ракетæ куыд стæхы, уый. Чызг йæхæдæг куыд зæгъы, уымæ гæсгæ ахæм фадат йæ къухы æнцонæй нæ бафтыд.
Зæххы къорийы тыгъдады алыварс цы бырæттæ ис, уыдонимæ куыд тох кæнын хъæуы, уыцы фарстайыл рагæй кусы Данæ. Æххуыс ын кæны йæ мад. Уымæ гæсгæ конкурсмæ цы æрмæг бацæттæ кодта, уый уыд цымыдисаг. Цы лæмбынæг куыст бакодта, уый йын æрмæст ног зонындзинæдтæ нæ балæвар кодта, фæлæ сæйрагдæр – йæ зæрдыл æппынæдзух кæй дардзæн, ахæм балц.
Проект «Фыццæгты космосон экспедици» баст уыд Юрий Гагарин космосмæ куы атахт, ууыл 63 азы кæй сæххæст, уыцы бонимæ. Нæ республикæйæ 3-аг къæпхæнмæ рацыдысты 3 адæймаджы, 2-мæ та æрмæстдæр Данæ. Ныр чызг иннæ уæлæхиздзаутимæ хъуамæ йæхи цæстæй фена, ракетæ уæлдæфмæ куыд стæхы, уый. Проекты архайджытæй финалмæ чи нæ рацыд, уыдон Данæйы уæлахиз бæзонгæйæ сразæнгард уыдзысты сæ зонындзинæдтæ фидæны проектты бафæлварыныл.
Данæйы цымыдисаг балц космодром «Байконур»-мæ уыдзæн августы. Чызг куыд фæнысан кодта, уымæ гæсгæ йæ иртæстытæ ацы конкурсы уæлахиздзинадыл не *рлæудзысты. Космосы æнæкæрон тыгъдады сусæгдзинæдтимæ бæстондæрæй зонгæ кæнгæйæ, тырны ног æнтыстдзинæдтæм.
