Раздæр медицинон куыстуат архайдта ковиды ныхмæ, уыди дзы вирус кæмæ уыдис, уыдонæн 360 бынаты
Буары низтæ дзæбæхгæнæн диспансер раздæхти йæ раздæры куысты фæткмæ. Раздæр медицинон куыстуат архайдта ковиды ныхмæ, уыди дзы вирус кæмæ уыдис, уыдонæн 360 бынаты. Сæ профилон архайд сног кодтой, коронавирусы инфекцийы уавæр кæй фæрæстæмбис, уый фæрцы. Уый тыххæй журналисттæн фехъусын кодта, диспансеры сæйраг дохтыр Джериаты Дианæ. Медицинон куыстуаты дохтырты æмбис уыдысты сæ куысты бынæтты, æмæ æххуыс кодтой ковидæй рынчынтæн. Иннæтæ пъланмæ гæсгæ, сæ куыст кодтой Дыгуры районы рынчындоны инфекцион хайады. Ныртæккæ се ппæт агъуыстытæ сты дезинфекцигонд. Диспансер уал райста 65 рынчыны, уыдонæй 14 сывæллæттæ. 45 адæймаджы сты суткæйы дæргъы стационары. Джериаты Дианæйы ныхæстæм гæсгæ, антибиотиктæ æмæ æндæр хостæ адæм æнæцæстдардæй бирæ кæй фæнызтой, уый тыххæй бирæтæн стыхджын сты буары низтæ. Диспансермæ æххуысагур чи цæуы, уыдоны нымæц фæстаг рæстæг зынгæ фæфылдæр.
