Буроны цæрджыты алы бон Мызурмæ цæуын нæ фæнды, фæлæ сын хуыздæр гæнæн нæй. Æрыгон ныййарджытæ сæ сывæллæтты уырдæм ласынц рæвдауæндонмæ. Машинæ кæмæ нæй, уый
12 километры иу `рдæм, иу уый бæрц та иннæ `рдæм. Уый у Бедойты Светланæйы æрвылбоны балц. Уыцы фæндагыл йæ сывæллоны фæкæны рæвдауæндонмæ. Йæ кæстæры та афæдз æмæ æрдæг кæуыл цæуы, уый кæимæ ныууадза, уый нæ вæййы. Уымæ гæсгæ йæ ахæссы йемæ. Абон куыд фæзæгъынц, йæ хъуыддаг фæрæстмæ. Æрыгон ныййарæгмæ баурæдта уыцы рдæм чи цыди, ахæм машинæ, æмæ йæ баласта Буронæй Мызурмæ.
Бедойты Светланæ, Буроны цæрæг: «Кæд нæм исчи баурома, уæд хорз. Кæд нæ, уæд та автобусмæ фæлæудзыстæм. Алы бон дæр афтæ. Хистæртæн сæ бон куы нæ у, уæд сывæллæттæ та куыд кæной?».
Буроны цæрджытæ хи рæвдауæндонмæ рагæй бæллынц. Куыд зæгъынц, уымæ гæсгæ сын æнæмæнг у. Районы администрацимæ дыууæ хатты арвыстой курдиæттæ, скъолайы агъоммæ ахуыргæнæндоны куыст сног кæныны тыххæй. Ныр та цæттæ кæнынц 3-аг фыстæг.
Гогаты Тамарæ, Буроны цæрæг: «Мадæлтæн дæр сæ бон нæу куыстмæ бацæуын. Сывæллон рæвдауæндонмæ куы нæ цæуа, уæд æй кæимæ ныууадза…».
Буроны ис рæвдауæндонмæ цæуыны кары 17 сывæллоны. Зæронд рæвдауæндон куы æхгæдтой, уæд та дзы 4 сабийы йедтæмæ нæ уыди. Ныр хъуыддаг фæхуыздæр. Поселочы рæвдауæндон нæй 7 азæй фылдæр. Ома, бæстыхай ныр дæр ис, фæлæ рагæйдæр дзуапп нал дæтты нæ санитарон, нæ æдасдзинады домæнтæн.
Районы администрацийы куыд зæгъынц, афтæмæй зæронд бæстыхай цалцæг кæнын у тынг зынаргъ. Æппынкъаддæр ын бахъæудзæн 20 милуан сомы. Ахæм æхцатæ районы нæй. Агурынц æндæр гæнæнтæ уавæр сраст кæныны тыхæй. Ныртæккæ ныхас цæуы æрæнхъахъхъæнджыты службæйы разамындимæ. Арæнхъахъхъæнджытæн Буроны аразынц бирæфатерон хæдзар. Ис рæвдауæндон хæдзары фыццæгæм уæладзыджы саразыны хъуыды.
Гозымты Роман, Алагиры районы ахуырады управленийы хицау: «Нæхи балансмæ йæ райсдзыстæм. Кусджытæ дæр нæхæдæг ссардзыстæм. Цæрджытæн дæр хорз уыдзæн, æмæ арæнхъахъхъæнджытæн дæр. Уый уыдзæн æппæтæй хуыздæр гæнæн».
Рæвдауæндон байгом кæнæн ис скъолайы дæр. Ам ахуыр кæны 9 скъоладзауы. Ацы хъуыддаг саразыны аргъ у – 3 милуан сомы. Зæгъын хъæуы уый, республикæйы хъæутæй бирæтæ алыг кодтой фарста ахæм хуызы. Фæлæ æндæр гæгæтæ дæр ис, зæгъынц ахуырады министрады. Зæгъæм, цыбыр рæстæгмæ уæвыны фадат кæм ис, ахæм къордтæ.
Хи рæвдауæндæттæ дæр фæрогдæр кæниккой сæвзæрд уавæр. Уыимæ хорз гæнæн у хи бизнесы саразынæн дæр. Иу ныхасæй, сæйрагдæр у æнцад ма бадын, нæ районы разамындæн, нæ хъæуккæгтæн.
Касаты Наирæ
