Бæрæгбонмæ æрбахуыдтой районы æмæ хъæуты администрациты сæргълæуджыты æмæ кусджыты. Бирæтæ дзы се нæзæрдæхудт куысты тыххæй æрцыдысты хорзæхгонд.
Кировы районы культурæйы хæдзары æрæмбырд сты районы æмæ хъæуты администрациты минæвæрттæ. Ам сын кусæг фембæлд нæ уыд, æрбацыдысты æндæр æхсызгон цауы фæдыл – фыццаг хатт сбæрæг кодтой сæ профессионалон бон. Бынæттон хиуынаффæйады бон фидаргонд æрцыд Уæрæсейы президент Владимир Путины указмæ гæсгæ, ацы бæрнон оргæнты архайды райрæзты нысанимæ.
Нæкуысаты Барис, Кировы районы сæргълæууæг: «Хъæуы цæрæг, фыццаджыдæр, зоны хъæуы хицауы, районы хицауы. Йæ фарстатимæ фæцæуы, фыццаджыдæр, уыцы адæмимæ. Йæ фарста лыггонд куы нæ æрцæуа, уæд та дарддæр. Уый стыр бæрнон куыст у, æмæ дзы хъуамæ кусой бæрнон адæм. Абон фыццаг хатт сæ бæрæгбон бæрæг кæнынц. Фæнды мæ зæгъын, бынæттон хиуынаффæйады чи кусы, уыдоны къухы æнтыстдзинæдтæ куыд бафта».
Кировы районы ис 7 муниципалон сконды. Уыдоны админстрациты кусджытæ æрвылбон архайынц, цæрджыты риссагдæр фарстатæ лыг кæныныл. Бæрæгбоны Нæкуысаты Барис районы 18 бæрнон кусæджы се ‘нæзæрдæхудт куысты тыххæй схорзæхджын кодта кады гæххæттытæй. Уымæй уæлдай ма администрациты минæвæрттæ райстой республикæйы æфсæддон комиссарады æмæ профцæдисты организациты иугонды хæрзиуджытæ.
Басаты Светланæ, Кировы районы ветеранты Советы сæрдар: «Алчидæр нæ ардыгæй ацæудзæн ахæм хъуыдытимæ, хуыздæр ма куыд бакусæм, адæмæн хорздзинад куыд скæнæм. Зын уавæр ныртæккæ, зонæм æй. Фæлæ уыцы зын уавæрты дæр ис ссарæн хорз митæ, адæмы зæрдæмæ чи фæцæудзæн».
Бæрæгбон сæ аивадæй срæсугъд кодтой республикæйы зындгонд зарæггæнджытæ æмæ районы сфæлдыстадон къордтæ.
