Нырыккон бæстыхайы ис хæрзвадат кабинеттæ ног кусæнгæрзтимæ
Бындурон цалцæджы фæстæ Цыколайы байгом поликлиникæ. Нырыккон бæстыхайы ис хæрзвадат кабинеттæ ног кусæнгæрзтимæ. Цалцæджы куыстытæ бакодтой федералон проект «Æнæниздзинадхъахъхъæнынад» æххæст кæнгæйæ. Поликлиникæ боны дæргъы лæггад кæндзæн 300 адæймагæн, уыимæ сывæллæттæн дæр. Поликлиникæйы ис алыхуызон дохтыртæ лор, окулист, кардиолог, хирург, невропатолог æмæ æндæртæ. Ис дзы стоматологы кабинет дæр. Нæ республикæйы сæргълæууæг Сергей Меняйло йæ телеграм каналы куыд ныффыста, афтæмæй поликлиникæйæн уæлæмхасæн радих кодтой 2 милуан сомы гинеколог æмæ окулисты кабинеттæн кусæнгæрзтæ балхæнынæн. Балхæдтой ма санитарон машинæтæ дохтыртæн – ныр сын рынчынтæм сæ хæдзæрттæм цæуыны уавæртæ зынгæ фæрогдæр уыдзысты. Æдæппæтæй поликлиникæйы кусы 23 дохтыры æмæ астæуккаг къæпхæны 31 специалисты. Программæ «Земский докторы» фæрцы ацы аз республикæйы куыстмæ райстой 22 дохтыры æмæ 5 медицинон кусæджы, уыдонæй 4 кусдзысты Æрæфы районы.
