Экологон акцийы ма архайдтой мыхуыры хъуыддæгты æмæ дзыллон коммуникациты комитеты минæвæрттæ, парти «Иугонд Уæрæсе»-йы активисттæ æмæ клуб «Ирон Груп»-ы уæнгтæ
Бырæтты 30 голлагæй фылдæр æрæмбырд кодтой ивгъуыд фæлладуадзæн бонты Цæгат Ирыстоны журналисттæ. Акцийы ма архайдтой мыхуыры хъуыддæгты æмæ дзыллон коммуникациты комитеты минæвæрттæ, парти «Иугонд Уæрæсе»-йы активисттæ æмæ клуб «Ирон Груп»-ы уæнгтæ. Ацы хатт сыгъдæг кодтой Хилакы донгуырæн. Сæрмагондæй туристтæн та ныууагътой зæрдылдарæнтæ. Экологон акцийы тыххæй бæстондæр радзурдзæн Гуытъиаты Алинæ.
Куырттаты ком нымад цæуы Ирыстоны рæсугъддæр кæмттæй иуыл. Ацы бынатæй райдайы йæ даргъ фæндаг Фыййаджыдон. Æрдзы нывтæм кæсгæйæ бырæтты кæритæ æвваст нæ фендзынæ. Фæлæ цæст куы æрцахуыр уа, уæд дæм разындзсты, цалдæргай азтæ чи æмбырд кодтой, ахæм кæритæ гæххæттæй, авгæй, пластикæй æмæ целофанæй.
Журналисттæ ардæм æрбацыдысты дыккаг хатт. Фыццаг зиуы фæстæ уавæр зынгæ фæхуыздæр. Фæлæ туристты уарзон бынаты бырæттæ раст цæстыфæныкъуылдмæ амбырд вæййынц.
Бырæттæ æгæр бирæ кæй сты, уый тыххæй акцийы архайджыты зæрды ис ноджыдæр иу зиу саразын.
Цалдæр сахатмæ журналисттæ æрæмбырд кодтой дыууын голладжы бырæттæ. Фæлладуадзджытæн та ныууагътой амонæн нысан, цæмæй сын сæ куыстæн аргъ кæной, æмæ æрдз хъахъхъæной.
