Чиныгдон йæ дуæрттæ ныр байгом кодта бындурон цалцæджы фæстæ
Чиныг «Ратная слава Алагира» æмæ горæты фæндагамонæджы презентаци ацыд районы центры фыццæгæм библиотекæйы. Чиныгдон йæ дуæрттæ ныр байгом кодта бындурон цалцæджы фæстæ. Уый бантыст национ проект «Бинонтæ» æххæстгæнгæйæ. Бæстондæр радзурдзæн Чехойты Фатимæ.
Сæ хъайтардзинад æнустæм рох нæ уыдзæн. Алагиры фыццæгæм библиотекæйы арæзт æрцыд чиныг «Ратная слава Алагира»-йы æмæ горæты фæндагамонæджы презентаци. Сæ автор у библиотекæйы кусæг, публицист, библиотекæйы историон клуб «Истоки»-йы разамонæг Лаурæ Касимова.
Чиныджы цыппæрæм хай фыст у, Советон Цæдисы хъайтары ном хъуамæ чи райстаид, фæлæ Сызгъæрин стъалы йæ риуыл бакæнын кæмæн нæ бантыст, уыцы хъæбатыртыл. Уыдонæй иу у хæсты ветеран Максим Тетерин. 43-æм азы йæ командæгæнæг куы фæцæф, уæд знаджы æхст нæ хъуыды кæнгæйæ, разамонæг лæвæрдта цæугæдон Ольшанкæйы сæрты бахизæнтæ аразджытæн. Хъæбатыры тыххæй бакæсæн ис чиныджы сыфтыл.
Фыдыбæстæйы Стыр хæсты ветеран Агалар Касимовы чызг Лаурæйæн ацы чиныг Алагиры æмæ республикæйы цæрæг хъайтарты тыххæй фыст фыццаг нæу. Бæлвырд æй зоны, хæсты хъæбатырты тыххæй мысинæгтæ хъахъхъæнын ахсджиаг кæй у, уый.
Алагиры фæндагамонæг у 2023-æм азы уагъд чиныг «Улицы Алагира, память имен»-ы уæрæхгонд хуыз. Автор æй баххæст кодта ног æрмæгæй – хуызистытæй æмæ цымыдисаг хъусынгæнинæгтæй.
Лаурæ Касимова ныртæккæ цæттæ кæны хæсты ветеранты æмæ сæ бинонты хъысмæттыл очерктæ. Уый та дзуры ууыл, æмæ тагъд рæстæг рухс кæй фендзæн, Цæгат Ирыстоны историйы тыххæй фыст, ног чиныг.
