Йæ куыст баст у, биотехнологтийы факультеты микроорганизмты коллекцийы штаммты бындурыл æхсыры продукци цæттæ кæнынимæ
Хæххон паддзахадон аграрон университеты студент Владимир Шевченко фæуæлахиз инновацитæн æмархайды фонд «Студентон стартап»-ы конкурсы. Йæ куыст баст у, биотехнологтийы факультеты микроорганизмты коллекцийы штаммты бындурыл æхсыры продукци цæттæ кæнынимæ. Гранты фæрæзтæй студент балхæдта хъæугæ ифтонггæрзтæ æмæ хæстæгдæр рæстæг райдайдзæн йæ проект æххæст кæнын. Бæлвырддæр радзурдзæн Хъайтмазты Дзерассæ.
Лабораторийы ахадгæ куыст Владимир Шевченкойы хæстæгдæр кæны йæ ахсджиаг нысанмæ. Биоархитекторы хуызæн, аграрон университеты студент хайгай æмбырд кæны фидæны æнтуан. Арæзт цæуы биотехнологийы факультеты микроорганизмты коллекцийы штаммты бындурыл. Цæттæ кæны йæ фыццаг проект царды уадзынмæ. Инновацитæн æмархайды фонд «Студентон стартап»-ы грантон конкурсы уæлахиздзау йæ милуанæй цæттæ кæндзæн æхсыры продукци. Ацы хъуыды йæм æрцыд университеты ахуыргæнджыты æххуысæй.
Йæ куыст райдайын æрыгон ахуыргонд фæнд кæны æхсыры сæртæ цæттæй кæнынæй. Иннæ къæпхæн уыдзæн – мисын. Педагогы разамындæй Владимир лæмбынæг ахуыр кæны штаммты гæнæнтæ.
Гранты фæрæзты хай хардзгонд æрцыд хъæугæ ифтонггæрзтæ æлхæнынæн. Сæрмагонд фæз Владимирæн радих кодта университет. Уæлдæр ахуыргæнæндоны цы хъæугæ агрегаттæ ис, уыдонæй фæстæмæ ма сыл бафтыдысты нырыккон микроскоп, стерилизацийæн автоклав æмæ уарæн станцæ. Ныртæккæ микролини монтаж кæнынц.
Райдайæн къæпхæны кондад стыр нæ уыдзæн. Фæлæ проекты автортæ куыд зæгъынц, афтæмæй бынæттон продукци конкурентты раз æмбулдзæн логистикæйы фарстайы. Рæстæг æмæ дæрддзæг комкоммæ ахадынц товарты хæрзхъæддзинадыл.
Проект аразыны хъуыддаджы Владимир Шевченкойæн зындзинæдтæ нæ уыд. Стыр æххуыс ын бакодтой ахуыргæнджытæ æмæ наукон разамонæг. Къуылымпыдзинад уыд конкурсы архайынмæ курдиат æмæ æппæт документтæ цæттæгæнгæйæ. Зæгъæм, архайæджы хъуыд амалхъом архайдæн хъæугæ формæ скæнын – уый æнæмæнг хъуамæ уа æнæххæстбарджын æхсæнад. Фæлæ ам дæр баххуыс кодтой педагогтæ. Грантон конкурсты ахуыргæнæндон арæх фæархайы.
Æхсыры продукцийы пилотон парти цæттæ кæнын райдайдзысты январы. Владимир Шевченко йын ном дæр æрхъуыды кодта. Ацы архайд фæуæрæхдæр кæнын та уыдзæн иннæ къахдзæф. Проекты автортæ йыл фæнд кæнынц фидæны бакусын.
