Горæтгæрон районы Дæллаг æмæ Уæллаг Санибайы хъæутæ куы равзæрдысты, уæдæй абонмæ дзы рæвдауæндон нæ уыд. Ныййарджытæ сæ сывæллæтты ластой Дзæуджыхъæумæ. Ныр сæ хъаст бахастой Æппæтуæрæсеон адæмон фронты регионалон хайадмæ, æмæ райстой дзуапп – 2021-æм азы Дæллаг Санибайы кæй сараздзысты, 120 бынаты кæм уыдзæн, ахæм рæвдауæндон.
Джиоты бинонты хъомыл кæны 5 сывæллоны. Дыууæйæ ахуыр кæнынц райдиан кълæсты, 2 -йы та цæттæ кæнынц скъоламæ. Сывæллæттæй иу дæр нæ цыд рæвдауæндонмæ. Дæллаг Санибайы уæвгæ дæр нæй, Дзæуджыхъæумæ ласын та фадат нæ амоны. Сæ мад кусы постхæссæгæй æмæ куысты фæстæ сывæллæтты ныууадзы сæ нанаимæ.
Дæллаг Санибайы ис 150 сывæллоны, сæ фылдæры ныййарджытæ ласынц Дзæуджыхъæуы рæвдауæндæттæм, фæлæ ныртæккæ карантины аххосæй сты æхгæд æмæ ныййарджыты дæр бахъуыд куыстæй хи ракурын. Фарста алыг кæныны охыл сæ хъаст бахастой æппæтуæрæсеон адæмон фронтмæ.
Уæллаг æмæ Дæллаг Санибайы сывæллæтты рæвдауæндон уæвгæ дæр никуы уыд. Бынæттон администрацийы хъуыдымæ гæсгæ сывæллæтты цæхæрадон арæзт куы æрцæуид, уæд бирæ бинонтæ баззаиккой хи хъæуы цæргæйæ.
Æппæтуæрæсеон адæмон фронт йæхимæ райста ацы фарста, æмæ цæст дардзæн рæвдауæндоны арæзтадмæ.
Горæтгæрон районы администрацийы зæрдæ бавæрдтой, Дæллаг Санибайы кæй уыдзæн ног рæвдауæндон. Йæ арæзтад хаст æрцыд 2021-æм азы бюджетмæ. бынат дзы уыдзæн 120 сывæллонæн.
