Ахæм фадат сын фæци Национ наукон библиотекæйы.
Дæсныйадæвдисæг ахуыртæ – республикæйы адæмон æмæ хæдахуыр театрты коллективтæн. Ахæм фадат сын фæци Национ наукон библиотекæйы. Сæ дæсныйады сусæгдзинæдтимæ сæ базонгæ кодтой режиссер Бекъойты Розæ, драматург Айларты Асæхмæт æмæ театралон аивады архайджыты цæдисы сæрдар Гуыбиаты Хъазыбег. Ахуырадон семинар уыд – Уæрæсейы театры аз æххæст кæнгæйæ. Цæуыл дзырдтой аивады кусджытæ, уый тыххæй радзурдзæн Фидараты Маринæ.
Хæдахуыр артисттæн æмæ адæмон театрты коллективтæн ахæм амындзинæдтæ тынг ахсджиаг æмæ хъæугæ сты. Уымæ гæсгæ сæ фæаразынц рæстæгæй-рæстæгмæ. Ацы хатт национ наукон библиотекæйы сæ дæсныйады сусæгдзинæдтæ раргом кодтой режиссер Бекъойты Розæ, драматург Айларты Асæхмæт æмæ театралон аивады архайджыты цæдисы сæрдар Гуыбиаты Хъазыбег. Уæвгæ, Уæрæсейы театры аз æххæст кæнгæйæ бирæ цымыдисаг мадзæлттæ, фембæлдтытæ æмæ фестивальтæ арæзт æрцыд. Дæсныйадæвдисæг ахуыртыл та бакуыстой Цæгат Ирыстоны театралон архайджыты цæдис, стæй культурæйы министрады методикон æххуысы центр. Уыимæ ма æргом здæхт æрцыд фидæны хъæуты адæмон театрты райрæзты фарстамæ.
Фембæлды ма театралон аивады архайджыты цæдисы сæрдар Гуыбиаты Хъазыбег скодта хатдзæгтæ сæ афæдзы куыстæн. Радзырдта, республикæйы цы мадзæлттæ арæзт æрцыд, уыдоны тыххæй. Се ппæтæн дæр фехъусын кодта сæ театралон къордты æнтæстдзинæдты тыххæй.
Ныхас ма цыд, æрæджы цы инклюзивном театр «Вдохновение» арæзт æрцыд, ууыл дæр. Зæгъын хъæуы уый, æмæ нæ бæстæйы ахæм театр дыккаг кæй нæй.
Уæдæ бирæ æнтыстдзинæдтæ бафтыд Æрæфы районы адæмон театры коллективæн дæр. Æрæджы Новороссийскы арæзт æрцыд хæдахуыр æмæ студентон театрты Æппæтуæрæсеон фестиваль. Уым адæмы размæ рахастой Гуыцмæзты Михалы пьесæмæ гæсгæ æвæрд спектакль «Бирæгътæ». Йæ сæйраг темæ – фæлтæрты хсæн ахасдзинæдтæ. Жюрийы уæнгтæ Цыколайы артистты архайдæн скодтой бæрзонд аргъ. Ууыл æрлæууынмæ нæ хъавынц, æмæ сæхи цæттæ кæнынц радон фестивальтæм, кæд æмæ Уæрæсейы театры аз фæвæййы, уæддæр. Æрæфы районы адæмон театрæй дæнцæг исынц республикæйы иннæ хæдахуыр коллективтæ дæр.
