Ныртæккæ дзы куыст цæуы дæсгай объектыл
Дарддæр цæуы, алы сезонты чи кусдзæн, уыцы курортон комплекс «Мамысон»-ы арæзтад. Ныртæккæ дзы куыст цæуы дæсгай объектыл. Фæрæзтæ дихгонд цæуынц цалдæр ранæй: федералон æмæ республикон бюджеттæй, стæй инвесторты æххуыс. Æппæт куыстытæ цæуынц фæткмæ гæсгæ. Аразджытæ зæрдæ вæрынц, афæдзы кæронмæ куыстыты фыццаг къæпхæн кæронмæ фæуыдзæн, æмæ курорт кусын райдадзæн. Бæлвырддæр радзурдзæн Касаты Наирæ.
Мамысонгомы стыр арæзтадон фæз апарахат æнæхъæн 5 километрыл. Фидæны курортон комплекс цы хуызæн уыдзæн, уый ныридæгæн бæрæг дары. Ныртæккæ дзы кусынц нырыккон техникæ æмæ сæдæгай специалисттæ. Цæугæдоны былгæрæттæ фидар кæнынц, аразынц сыгъдæггæнæн фæрæзтæ.
Аразджытæ архайынц бетонæй конд бындурыл, уый уыдзæн бæндæнæй конд фæндаджы дæллаг станцæйы.
Курортон комплекс арæзт цæуы Цæгат Ирыстоны рæсугъддæр бынæттæй иуы. Мамысонгом хъæздыг у историон æмæ æрдзон цыртдзæвæнтæй. Астæуккаг æнусты мæсгуытæ, митджын хæхтæ, абухгæ цæугæдæттæ, æмбал кæмæн нæй, ахæм уæлдæф. Ацы миниуджыты фæрцы фæлладуадзæн бынат кусдзын афæдзы дæргъы. Фыццаг къæпхæны дзы арæзт æрцæудзæн дыууæ бæндæнæй конд фæндаджы. Мамысоны æппæтæй уæлдæр бынат ис денджызы æмвæзадæй æртæ мин километры бæрзæндыл. Ныртæккæ дзы куыстытæ сты сæ тæмæны. Бынмæ дзы куы æркæсай, уæд та дзы зынынц къахдзоныгътыл бырыны трассæты бынæттæ. Алы цæджындз дæр бынатмæ æрбаласынц хайгай æмæ йæ стæй уым сæмбырд кæнынц.
Арæзтадæн фæрæзтæ дихгонд цæуынц алы рдыгæй. Къахдзоныгътыл бырыны æппæт инфраструктурæ, коммуникацитæ – уыдон сты федералон бюджеты бæрны. Фæндаг – республикæйы фæрæзты æххуысæй, фысымуæттæ æмæ хойраджы хъуыддаг та йæхимæ исынц инвестортæ. Резиденттæн дзы ис сæрмагонд экономон зонæйы уавæртæ. Ныртæккæ уыцы иу рæстæг арæзт цæуынц бирæ объекттæ.
Æппæт куыстытæ цæуынц сæрмагонд фæткмæ гæсгæ, æнæ къуылымпыйæ. Афæдзы кæронмæ арæзтады фыццаг къæпхæн кæронмæ фæуыдзæн æмæ «Мамысон» «æгас цæуай» зæгъдзæн йæ фыццаг уазджытæн.
