Дзæуджыхъæуы уыд фыццаг сæрдыгон спортивон фестиваль «ДВИЖение на Водной»
Дартс, бадминтон, стъолыл теннис, велотренажертæ æмæ ма ноджыдæр 3 фæзы уæлдæфы физкультурæйæ архайынæн. Дзæуджыхъæуы уыд фыццаг сæрдыгон спортивон фестиваль «ДВИЖение на Водной». Архайджытæ ерыс кодтой горæты администрацийы призтæ рамбулыныл. Сывæллæттæн уыд аквагримимæ, аниматортимæ æмæ эстафетатимæ фæзтæ. Фестиваль сарæзта Дзæуджыхъæуы администрацийы фæсивæдон политикæйы, физкультурæйы æмæ спорты комитет. Бæлвырддæр радзурдзæн Хъайтмазты Дзерассæ.
Сайклинг – Ирыстоны спортæн у ног къабаз, фæлæ йæ ныридæгæн бирæтæ бауарзтой. Доны станцæйы фестиваль «ДВИЖение»-йы дæр ацы фæз фæлладуадзджытæн æппæтæй цымыдисагдæр уыд. Фæндыд сæ, райдертæм бакæсын, байкыл хи гæнæнтæ афæлварын, æмæ бамбарын, уый хуымæтæг велосипед нæу, фæлæ бирæфункционалон тренажер.
Сайклинг сси спортивон фестиваль «ДВИЖение»-йы авд локацийæ иу. Æмæ кæд ацы къабаз фылдæр сылгоймæгты зæрдæмæ фæцыд, уæд нæлгоймæгтæн та цымыдисагдæр уыдысты тых фæлварæн тренировкæтæ. Бестауты Сæрмæт фыццаг бафæлвæрдта йæхиуыл пауэрлифтингы гæнæнтæ. Доны станцæмæ æрбацыд йе мбæлттимæ аленк кæнынмæ, бахауд та спорты бæрæгбонмæ.
Спортивон фæлтæрæнты фæстæ интеллектуалонтæ. 10 шахматон фæйнæджы – 10 æвзонг спортсмены хъазынц иу, фæлæ фæлтæрдджын ныхмæлæууæгимæ. Ацы спортуарзджытæ Ирыстоны бирæ сты.
Дартс, стъолыл теннис, бадминтон, волейбол. Спорты фестиваль «ДВИЖение» Дзæуджыхъæуы фыццаг хатт уыд. Сарæзта йæ горæты администраци. Архайын дзы уыд, Доны станцæмæ чи æрбацыд, уыдонæй алкæйы бон дæр.
Фестивалы æппæтæй æвзонгдæр уазджытæн бацæттæ кодтой ирхæфсæн программæ. Сывæллæттæн уыд аквагримимæ, аниматортимæ æмæ эстафетатимæ фæзтæ. Сæдæгай адæмæн бæрæгбоны уыд, сæ гæнæнтæ алы хуызты афæлварыны фадат. Мадзал æнæмæнг алкæйы зæрдæмæ дæр фæцыд.
