Адæмы хсæн апарахат, ома продукттæ фæзынаргъдæр уыдзысты зæгъгæ, ахæм информаци. Фæлæ, уый дæр нæ уыди.
Коронавирусæй тагъддæр парахат кæны адæмы хсæн мæнг информаци. Социалон хызты, хицæн адæмты аххосæй, иннæтæ сæхи тæрсын кæнынц продуктты дефицитæй. Адæм æлхæнынц хойраджы продукттæ, интернеты та фенæн ис афтид тæрхæджытæ. Цæгат Ирыстонæн продуктты дефицитæй тæссаг у, æви нæ, уый райртасыныл бацархайдта не сфæлдыстадон къорд. Касаты Наирæ – бæлвырддæр.
Дефицит нæй, æмæ нæ уыдзæн. Зноны афтид тæрхæджытæ абон сты продукттæй дзаг. Социалон хызты æмæ мессенджерты аналитикты хъуыдыты ныхмæ, базарадон куыст нæ фæкъуылымпы. Гречкæ дæр иннæ продуктты хуызæн уыдзæнис. Ацы бонты дуканиты къух бакæнæн нæ уыди. Адæм æлхæдтой алыхуызæн продукттæ, уыимæ хъæуы, æви нæ хъæуы, ууыл нæ хъуыдыгæнгæйæ. Адæм афтæ кæй тыхсынц, уый нæ фæзынди бынæттон стыр дуканиты хызтыл.
Федералон æмвæзадыл дуканиты хызтæ дæр цæуыл тыхсой, ахæм аххосæгтæ нæй. Продукттæ исынц афоныл, æмбæлгæ хуызы. Тæрхæджытæ сты дзаг. Товартæ ам исынц фæткмæ гæсгæ бонцухæй. Ахæм системæмæ гæсгæ кусынц стыр базарадон хызтæ.
Дуканиты адæм фылдæр æлхæдтой кърупатæ, æхсыры продукттæ, æйчытæ, ссад, нæлхæ, дзаумæттæ хсæнтæ. Адæмы хсæн апарахат, ома продукттæ фæзынаргъдæр уыдзысты зæгъгæ, ахæм информаци. Фæлæ, уый дæр нæ уыди.
Дуканитæ фæлхасадон продукттæй ифтонг кæныныл ныхас цыди республикæйы экономикон рæзты министр стыр базарадон хызты базарты разамонджытимæ цы æмбырд сарæзта, уым. Цæгат Ирыстоны Сæргълæууæджы уынаффæмæ гæсгæ, ведомствæйы аргъ скодтой уавæрæн. Томайты Хъазыбег бабæрæг кодта цалдæр уæйгæнæн бынаты.
Министрады сидынц амалхъом адæммæ, цæмæй продукттæй чи ифтонг кæны, уыдонимæ кусой комкоммæ. Мæнг дефициты уавæр сæвзæрды аххосаг у уый дæр, æмæ адæм уыцы-иу рæстæг дуканитæм куы бацыдысты, уæд дзы се ппæты фаг нæ разынди хъæугæ продукттæ. Министр куыд зæгъы, афтæмæй базартæ бахъахъхъæнын хъæуы, продукттæ чи балхæны, æмæ сæ уый фæстæ зынаргъдæрæй чи фæуæй кæны, ахæм адæмæй. Уымæй уæлдай, адæм хъуамæ продуктты дефицитæй сæхи ма тæрсын кæной. Уымæн уæвæн нæй.
