Чысыл комплексы ис нырыккон технологиты стыр дуне
Бæлвырд наукæтæ æмæ виртуалон дуне хуыздæр базоныны тыххæй Дигорайы 3-æм скъолайы байгом мобилон технопарк «Кванториум». Чысыл комплексы ис нырыккон технологиты стыр дуне. 3D принтертæ, робототехникæйæн кусæнгæрзтæ. Иу дзырдæй алцыдæр, цæмæй республикæйы алы районтæй скъоладзаутæн фадат уа инженерон дунейы бындуртæ базонынæн. Технопарк бабæрæг кодта нæ уацхæссæг Бокоты Виктория дæр, æмæ йын ныхасы бар.
Компьютерон хъæзтытæ аразын, дронты конструкциты æмæ роботты программæтæ кæнын. Инженерон дунеимæ зонгæ кæнынæн республикæйы скъоладзаутæн фадат фæци мобилон технопарк «Кванториум»-ы фæрцы. Цæугæ мобилон станцæйы ис бирæвæрсыг комплекс. Сæрмагондæй фæлварæнтæ, модельæ æмæ конструкцитæ аразынæн.
Технопарк кусдзæн дыгай къуыритæ республикæйы алы районы. Фыццæгтæ йæ бафæлвæрдтой Дигорайы 3-æм скъолайы ахуырдзаутæ.
Технопарк кусдзæн, федералон программæ «Алы сывæллоны æнтыстдзинад» æххæст кæнгæйæ. Программæ республикæйы дæрддзæф районты скъоладзаутæн фадат дæтты техникон ахуырад исынæн, нырыккон кусæнгæрзтæй пайда кæнгæйæ.
Дигорайы фæстæ мобилон лаборатори абалц кæндзæн Алагиры районы скъоладзаутæм. 2021-æм азы та ма Цæгат Ирыстоны фæзындзæн ноджыдæр 2 мобилон Кванториумы.
