Сбæрæг дзы кодтой, 55 азы размæ Польшæйы хæххон фольклоры фестивалы ансамбль «Кафт» цы уæлахиз æрхаста, уыцы цау
Дигорайы культурон рæзты Центры уыд кадджын мадзал. Сбæрæг дзы кодтой, 55 азы размæ Польшæйы хæххон фольклоры фестивалы ансамбль «Кафт» цы уæлахиз æрхаста, уыцы цау. Культурон мадзалы кадджын уазджытæ уыдысты ансамблы уыцы рæстæджы уæнгтæ. Кад та сын кодтой, нæ республикæйы Парламенты сæрдар Тускъаты Таймураз, Дыгуры районы администрацийы сæргълæууæджы хæстæ æххæстгæнæг Хохойты Валерий, национ политикæйы æмæ æддагон бастдзинæдты министрады хайады хицау Цыбырты Аллæ, стæй компани «Фармация»-йы генералон директор Хъодзасты Валентинæ. Æппæтадæмон фестивалы ансамбль «Кафт»-ы уæлахиз уыд стыр æнтыстдзинад. Уыимæ канд Дыгуры районæн нæ, фæлæ Ирыстонæн æмæ æнæхъæн бæстæйæн дæр. Зæгъдзыстæм ма уый дæр, æмæ уæд фестивалы архайдтой 19 паддзахады минæвæрттæ. Ансамблы ветерантæ ацы изæр истой алыхуызон лæвæрттæ. Уымæй дарддæр сын радтой хæрзиуджытæ дæр. Культурæ æмæ аивадмæ стыр æвæрæн кæй бахастой, стæй адæмты хсæн хæлар ахастдзинæдтæ кæй парахат кодтой, уый тыххæй сын Парламенты номæй радтой кады гæххæттытæ. Дыгуры районы администрацийæ та арфæйы фыстæжытæ. Дигорайы кадджын цæрæджы ном лæвæрд æрцыд Сабанты Еленæйæн.
