Мадзал сарæзтой æхсæнадон организаци Стыр Ныхасы æххуысæй
Дигорайы сбæрæг кодтой зындгонд капитан, Советон Цæдисы хъæбатыр Къесаты Астаны райгуырды 110 азы. Мадзал сарæзтой æхсæнадон организаци Стыр Ныхасы æххуысæй. Архайдтой дзы Дигорайы администрацийы разамынд, бынæттон цæрджытæ, скъоладзаутæ, интеллигенцийы минæвæрттæ. Уыдон фыццаджыдæр дидинджытæ сæвæрдтой Къесаты Астаны цыртдзæвæнмæ, уый фæстæ араст сты Дигорайы музеймæ. Хъæбатыр капитаны цардæрфысты тыххæй радзырдта профессор, историон наукæты доктор Лолаты Батраз. «Астаны хуызæттæй фидауы Ирыстон, æмæ йæ ном хъуамæ рох макуы уа», — загъта йæ раныхасы Стыр Ныхасы сæрдар Уататы Зелим. Дарддæр уазджытæн равдыстой цыбыр видеоныв Къесаты Астаны тыххæй, уый фæстæ та байхъуыстой капитаны цардæмбал Валентинæйы монологмæ. Æмдзæвгæтæ бакастысты Дигорайы дыккæгæм скъолайы ахуырдзаутæ.
