Сарæзтой дзы сывæллæтты рæвдауæндоны уæлæмхасæн бæстыхай, 2-æм скъолайы та уыдзæн спортивон фæзуат
Дигорайы та аразынц æмæ цалцæг кæныц, социалон нысаниуæг кæмæн ис, ахæм ахсджиаг объекттæ. Сарæзтой дзы сывæллæтты рæвдауæндоны уæлæмхасæн бæстыхай, 2-æм скъолайы та уыдзæн спортивон фæзуат. Ног ирхæфсæн бынат фæзындзæн сывæллæттæн дæр. Гергиты Валерийы номыл парчы дæр цæуынц аивгæнæн куыстытæ. Ацы объекттæ бабæрæг кодта не сфæлдыстадон къорд, æмæ цы федтой, уый тыххæй радзурдзæн Моргуаты Ладæ.
Электрон тыхдæттæг телтæ, пъолтæ æмæ къулты аивгæнæн куыстытæ. Алцыдæр арæзт цæуы, цæмæй Дигорайы 5-æм рæвдауæндоны уæлæмхасæн бæстыхай афойнадыл байгом кæной? уый тыххæй. Бынат дзы уыдзæн 55 сывæллонæн. Куыстытæ цæуынц æмгъуыдæй раздæр.
Дигорайы дыккæгæм скъолайы кæрты та æвæрд цæуы чысыл футболæй хъазыны фæз, згъорæн фæндаг, чысыл баскетболæй хъазæн фæзуат æмæ спортуарзджытæн бадæн бынæттæ. Æвæрынц дзы турниктæ æмæ алыхуызон спортивон фæлтæрæнтæ кæнынæн тренажертæ. Скъоладзаутæ, сæ ныййарджытæ æмæ ахуыргæнджытæ цымыдисæй æнхъæлмæ кæсынц, кæд байгом уыдзæн, уымæ. Паддзахадон программæ «Физкультурæ æмæ спорты райрæзты» фæрцы ахуырдзаутæн фæзынд бирæ ног гæнæнтæ.
Ацы æмæ æндæр социалон ахсджиаг объекттæ цæттæ уыдзысты афоныл, зæгъынц районы администрацийы.
Дигорайы ма куыстытæ цæуынц «Горæты æнцонвадат архайды» программæмæ гæсгæ. 6 кæрты сты аивгод, сæвæрдтой дзы асфальт, бандæттæ, рухсытæ. Гергиты Валерийы номыл парчы дæр куыстытæ фæвæййынц. Ам уыдзæн сывæллæттæн ирхæфсæн фæз.
